08/02/2012
A Xunta corrixe o modelo de internacionalización do sector audiovisual
Conseguir unha maior presenza internacional das producións audiovisuais galegas. Este é un obxectivo “prioritario” para un “sector estratético” tal e como apuntaron esta mañá Xesús Vázquez, conselleiro de Cultura e Educación, e Javier Guerra, conselleiro de Economía e Industria no sinatura dun convenio para a Internacionalización do Sector Audiovisual Galego que afecta a órganos directivos do seu departamento (Consorcio Audiovisual de Galicia- CAG- e IGAPE, respectivamente). Será a través do Consorcio, función inherente á súa propia natureza, e implicará un cambio de modelo con respecto ao que se estaba a facer. Anxo Quintanilla, director-xerente do CAG, apuntou que se trata dunha “maior coordinación que supón que a aquelas citas que non vaia o Consorcio irá o Clúster e viceversa”. En total, este convenio destina a este fin 350.000 euros para os vindeiros dous anos..
Amplía a nova>>
08/02/2012
A terceira edición do Mufest chega a Compostela
Un ano máis o Centro Galego de Arte Contemporánea acolle o Mufest, festival de cine feito por mulleres que organiza a revista
Andaina. A iniciativa programa desta volta trece filmes e contará coa presenza de directoras como a inglesa Deborah Haywood ou María Victoria Martins, que abordará desde unha perspectiva feminina a pegada do franquismo no noso país. Tamén haberá unha charla sobre a directoras portuguesas a cargo de Ana Caterina Pereira. No feche do evento, o día 25, entregaranse os premios do festival, que serán de mil euros para as categorías de Ficción, Documental e Animación. Tamén haberá unha Mención Especial para a Mellor Obra Orixinal en Galego..
Amplía a nova>>
07/02/2012
Ponse en marcha a IX edición de Mundos Dixitais
É unha das citas de referencia no campo da animación, efectos especiais, videoxogos e arquitectura dixital. A IX edición de Mundos Dixitais xa está en marcha coa apertura (ata o 25 de maio) do prazo de presentación de solicitudes para a súa sección oficial nas catro categorías a concurso: mellor curtametraxe de animación, mellor curtametraxe de animación nacional, premio especial do público e premio especial do xurado. De momento, o web oficial do certame non achega máis información sobre o programa (desde as conferencias ata as xornadas profesionais para recrutar persoal) ou os patrocinadores deste encontro que se desenvolverá entre o 4 e o 7 de xullo na Coruña. A única pista sobre a temática desta edición, figura no Facebook corporativo que asegura será “unha edición aterradora”. .
Amplía a nova>>
07/02/2012
Luís Tosar gaña o premio Gaudí polo seu traballo en Mentres durmes
Mentres durmes, de Jaume Balagueró foi a gran trunfadora dos Premios do Audiovisual catalán, os Gaudí. Un filme no que o galego Luís Tosar (Lugo, 1971) foi galardoado pola interpretación dun porteiro dunha finca residencial obsesivo e paranoico. O actor lucense tamén é finalista aos Goya pola súa interpretación neste filme que onte recibiu seis galardóns, entre eles mellor película en lingua non catalá, mellor guión e mellor director. O premio á mellor película en lingua catalá foi para Eva, filme que contaba con 16 candidaturas. Este filme tamén foi premiado pola actuación de Lluís Homar, como actor secundario. Os IV Premios Gaudí son galardóns que concede a Academia do Cinema Catalán..
Amplía a nova>>
03/02/2012
Arrinca en Vedra unha nova edición do seu programa audiovisual, o LAV012
É a primeira das dúas fins de semana coas que Vedra pretende dinamizar esta zona cun programa audiovisual que contempla desde o aspecto formativo ata o de exhibición. No que atende ao primeiro, comezarán con cinco cursos (Animación stop motion, O intérprete diante da cámara, Postprodución dixital, Iniciación ás
curtametraxes para o alumnado de ESO e Interpretación na dobraxe). Da outra, entre as proxeccións figura a estrea de tres traballos.
Canción de Ninar, un drama dirixido por Martín Rodríguez,
Noutra pel é unha curta resultante dun taller de cine impartido por Margherita Morello, sobre unha idea de Mª Jesús Picallo Ferreiro. Pechan as proxeccións,
Xeira un drama rural centrado nuns personaxes marcados pola traxedia. Escrito e dirixido por Marisa Otero..
Amplía a nova>>
03/02/2012
Dúas empresas do sector audiovisual apoiadas por Xesgalicia acumulan perdas millonarias
Xa era coñecido que tanto Bren Entertainment como Dygra Films atravesaban un delicado momento financeiro.
El País publica hoxe unha ampla reportaxe na que estas entidades aparecen no listado de empresas apoiadas pola Xunta en Xesgalicia que perden cartos. Segundo cita este medio, remitindo a datos do Rexistro Mercantil, Bren Entertainment acumula perdas por 922.645 e Dygra Films de 755.041 euros. As dúas empresas figuraban no listado de empresas apoiadas con cargos a fondos públicos de capital risco (SCR)..
Amplía a nova>>
03/02/2012
Play Doc prepara a súa oitava edición que se centrará na paisaxe
É a “xoia cultural tedense”, tal e como asegurou Vanesa Rodríguez, concelleira de Cultura e Educación desta localidade pontevedresa. Por iso, o Play Doc non faltará á súa cita co documental. Será nun formato que se mantén fiel á súa estrutura habitual, aínda que haberá cambios. Malia que aínda non se coñece a programación, desde o festival confirman que este ano estará centrado temáticamente na paisaxe. Na sección oficial a competición repartiranse un total de 5.000 € en premios e a cita será do 21 ao 25 de marzo..
Amplía a nova>>
02/02/2012
Unha clase maxistral dará claves de como funciona un mercado audiovisual
Félize Frappier traballa no sector da distribución como axente de vendas para Max Films International desde 2003, conseguíu vendas para películas como Seducing Dr. Lewis, The Far Side of the Moon, Borderline e Crying Out. O vindeiro martes estará en Compostela (aula CeMIT do Centro Multimedia de Galicia) para dar unha clase maxistral sobre
Audiovisual Marketing and International Sales. A cita está organizada polo Consorcio Audiovisual de Galicia en colaboración coa Academia Galega do Audiovisual e o Instituto Galego de Promoción Económica (IGAPE). .
Amplía a nova>>
02/02/2012
A Academia do Cine elimina a O mago dubidoso da candidatura dos Goya
A suspensión cautelar de
The Little wizard. O mago dubidoso da produtora galega Deboura facía sospeitar o que onte confirmou a Xunta Directiva da Academia de Cine, que a cinta non estará finalmente na loita polos Goya na categoría de mellor longametraxe de animación. A produción foi eliminada por “incumprimento das bases de participación” tal e como figura no web da Academia de Cine. A decisión tomouse nunha Xunta Directiva desenvolvida onte está tomada por unanimidade e é inapelable. De tal xeito, as finalistas nesa categoría son
Engurras,
Cartago Nova e
Papá, son unha actriz. A gala de entrega dos premios terá lugar o vindeiro 19 de febreiro. .
Amplía a nova>>
01/02/2012
O Cineclube Padre Feijoo e o Festival de Ourense dedican o ciclo de febreiro ao cine político
Comeza un novo ciclo do Cineclube Padre Feijoo e do Festival de Cine de Ourense que abordará durante o mes de febreiro, as miradas sobre a xerarquía eclesiástica, o terrorismo islámico e a corrupción política. O ciclo de cine político contará con tres filmes dirixidos por Nanni Moreti (Habemus Papam), Chris Morris (Four Lions) e Paolo Sorrentino (Il Divo). As proxeccións, coma sempre, serán no Cinebox do centro comercial Pontevella. Ademais, este mes estrea unha novidade na programación que é o aumento dun pase (o das 18:00h), que se suma aos xa clásicos de 20:30 e 23:00h..
Amplía a nova>>
