26/03/2015
A sección oficial do Carballo Interplay reúne 43 webseries
Un total de 43 webseries, 20 do estado, 18 Internacionais e 5 galegas competirán na sección oficial do II Carballo Interplay. O festival dedicado ás producións para a rede celebrarase entre o 16 e o 18 de abril vindeiros co dúo Venga Monjas como convidados estrela. Clases maxistrais de Joan Carles Martorell e Belén Santa-Olalla no ámbito dos coloquios profesionais, e Poetarras, Igmig e RDA a cargo dos concertos nocturnos son outras das actividades previstas. Entre as novidades para este ano, destaca a posta en marcha dun proxecto de recuperación da memoria audiovisual local en colaboración co Proxecto Socheo. .
Amplía a nova>>
24/03/2015
Fely Manzano recibirá o Mestre Mateo de Honra
O seu "amplo labor no mundo escénico" e o "traballo realizado no audiovisual galego desde o seu mesmo inicio" valéronlle á actriz Fely Manzano o recoñecemento da Academia Galega do Audiovisual. Manzano recibirá o vindeiro 12 de abril o premio de Honra dos Mestre Mateo no transcurso da gala dos premios do noso audiovisual. A intérprete é coñecida polo grande público pola súa presenza en series como
Pratos Combinados,
Fíos ou
A vida por diante ou filmes como
Urxa,
A lingua das bolboretas,
Lena ou
La rosa de Alejandría. Ademais, ten participado en múltiplas curtametraxes e posúe unha ampla experiencia no ámbito teatral..
Amplía a nova>>
23/03/2015
A fenda do proxector
O pasado mércores abría en Compostela NUMAX, a primeira sala privada dedicada ao cinema independente do noso país. Unha proposta arriscada e anovadora, que chama a recuperar a experiencia do cinema no centro das cidades, con horarios diferentes e fóra da corrente principal de estreas de Hollywood. A iniciativa desenvólvese nun contexto no que semella que están a coller forza, tanto dentro como fóra do noso país, as vías alternativas para exhibición en salas..
Amplía a nova>>
17/03/2015
Cans recoñece a Javier Gutiérrez co seu Pedigree
A asociación Arela, que organiza cada ano o Festival de Cans, acordou homenaxear co seu premio Pedigree o actor Javier Gutiérrez en "recoñecemento á súa traxectoria e tamén á súa constante capacidade de traballo". Ademais, outorgoulle os galardóns Pepe Puime, antigos Chimpíns de Prata, ao director Alfonso Zarauza pola "gratitude a lealdade que o cineasta lle amosa ano tras ano ao festival", e mais ao carpinteiro e veciño de Cans Juan Maceira como un agradecemento á súa implicación continua na organización do evento..
Amplía a nova>>
17/03/2015
Abre en Compostela NUMAX, a nova sala independente de cinema
Nubes pasaxeiras de Aki Kaurismäki sera o filme co que abrirá mañá, ás 12 da mañá en Compostela, NUMAX, unha nova sala dedicada ao cinema independente. A proxección, nunha sesión de portas abertas, suporá a estrea internacional da versión restaurada e dixitalizada do título. O proxecto, nado da man dunha cooperativa e cun amplo apoio social que o avalou economicamente, ofertará unha programación diaria de cinco sesións entre martes a domingo. A carteleira estará composta tanto por estreas de cinema independente difícil de atopar noutras salas, como por clásicos rescatados e por proxectos de autores pouco coñecidos. Todas as proxeccións será en versión orixinal con subtítulos..
Amplía a nova>>
16/03/2015
Galaxia abre a súa colección Libro cinema
Logo da explosión de libros-CD dos últimos anos, a nosa industria editorial dá un paso alén. Galaxia acaba de presentar a súa colección
Libro cinema, que arrinca con
A cicatriz branca de Margarita Ledo Andión. O filme achega o DVD con subtítulos e extras acompañado de textos que contextualizan e explica diferentes aspectos desta produción. O filme trata, a través dunha historia persoal, a problemática da emigración das mulleres galegas en solitario a América durante o século XX..
Amplía a nova>>
13/03/2015
A AGADIC mantén o seu apoio aos cineclubes
O director da Axencia Galega das Industrias Culturais, Jacobo Sutil, e o presidente da Federación de Cineclubes de Galicia, Manuel Precedo, asinaron onte o convenio polo que as dúas entidades renovan a súa colaboración en 2015. En concreto, a AGADIC achegará unha partida de 24.000 euros destinados a financiar as actividades das entidades integradas na Feciga. Desde os cineclubes comprométense a realizar ciclos e semanas temáticas de cinema nunha ducia de localidades do país, cunha especial atención á produción galega. A contía do convenio é a mesma desde que comezou esta colaboración, en 2012..
Amplía a nova>>
13/03/2015
Play Doc presenta a súa sección oficial
Sete filmes competirán na XI edición do Play Doc. O festival de documentais que se celebrará en Tui entre o 22 e o 26 de abril presentaba onte a súa sección oficial. Entre as participantes, destaca a presenza de catro filmes de directoras novas, Talena Sanders, Soon-Mi Yoo, Maureen Fazendeiro e Amanda Rose Wilder, que competirán con traballos de J.P. Sniadecki, Fernand Melgar e Göran Hugo Olsson. O evento puxo en marcha tamén a convocatoria para que os interesados poidan contribuír económicamente á organización do festival, e ten aberto o prazo de inscrición para o seminario Crítica e Programación, que organiza en colaboración coa revista A Cuarta Parede..
Amplía a nova>>
11/03/2015
A esmorga concentra 16 candidaturas aos Premios Mestre Mateo
A Academia Galega do Audiovisual daba a coñecer onte a listaxe de candidaturas aos XIII Premios Mestre Mateo. Na listaxe destaca de xeito particular unha produción,
A esmorga. O filme de Ignacio Vilar acumula nada menos que 16 nominacións dun total de 25 categorías, entre elas as de mellor filme, mellor dirección, mellor guión, e interpretación masculina. A este proxecto ségueo
Os fenómenos, de Alfonso Zarauza, que tamén opta a mellor filme, dirección ou guión, entre outros. Compite con elas nos apartados de dirección, guión ou dirección de fotografía a serie
Serramoura.
Schimbare, candidata a oito categorías é a seguinte produción con máis opcións..
Amplía a nova>>
09/03/2015
Cambre anímase co seu novo festival de cinema
Amosar, en formato cinema, obras mestras da animación de todos os tempos e promover a produción galega neste eido. Estes son os eixes básicos cos que nace Cambretoon, o festival de animación que se celebra por vez primeira entre os vindeiros 19 e 21 de marzo. Co lema
Do pincel ao pixel, a cita presta unha especial atención a difundir proxectos pioneiros da animación e facelo en formato película de cinema. Así, nesta primeira xeira poderán verse clásicos como
Gertie, the Dinosaur, de Windsor McKay,
Fantasmagorie de Émile Cohl ou algunhas das primeiras animacións de Walt Disney, como
Alice in the Jungle ou
Hell´s Bells..
Amplía a nova>>
