16/04/2025
O XII Carballo Interplay proxectará vinte series de 12 países na súa sección oficial
Unha vintena de series de doce países competirán na duodécima edición do Carballo Interplay (CIP). O festival de contidos dixitais que se celebra do 24 ao 27 de abril deu a coñecer o seu programa, no que destaca a presenza canadense, con cinco series a concurso. Ségueo España, con catro propostas, das cales tres son galegas..
Amplía a nova>>
15/04/2025
A nova edición de 'Films from Galicia' presenta 62 novos traballos
O novo catálogo de produción audiovisual galega presentada para público internacional
Films from Galicia presenta 62 novos títulos, dos que 48 están a piques de se estrear. Trátase de 30 longametraxes de ficción, 21 documentais, 4 obras de animación e 7 formatos televisivos, das que se ofrecen datos básicos e o contacto para a súa venda e distribución. entre os filmes atópanse dous seleccionados para a sección oficial do festival de Cannas, como
Sirat de Oliver Laxe, e
Romería, de Carla Simón, xunto cos últimos traballos de realizadores como Noemí Chantada, Santos Díaz, Anxos Fazáns, Andrés Goteira, Ángeles Huerta, Lois Patiño, Sandra Sánchez, Ángel Santos, Diana Toucedo ou Alfonso Zarauza. .
Amplía a nova>>
10/04/2025
Dez festivais audiovisuais reciben as axudas da Agadic
A convocatoria de axudas a festivais e mostras audiovisuais da Axencia Galega de Industrias Culturais da Xunta de Galicia ven de resolverse, beneficiando a 10 destas citas. Entre elas repártense os 300.000 euros de orzamento destinados a apoiar a consolidación do circuíto galego de estes eventos. Son oito asociacións culturais, o concello de Carballo e o Museo do Pobo Galego as beneficiarias este ano, con cantidades que oscilan entre os 48.265,73 destinados ao Play-Doc de Tui e os 9.561,64 para a Mostra Internacional de Cinema Etnografico do Museo do Pobo Galego. .
Amplía a nova>>
10/04/2025
'Sirat' de Oliver Laxe competirá na Sección oficial de Cannes
Nunha rolda de prensa transmitida hoxe en directo polo festival o delegado xeral, Thierry Frémaux, confirmou a presenza dentro da Sección oficial competitiva da 78ª edición do Festival de Cannes da película 'Sirat' de Oliver Laxe. Frémaux lembrou o paso anterior de Laxe polo festival cando en 2022 recbiu por 'O que arde' o premio do xurado dentro da sección
Un certain regard, o delegado indicou que este ano presentáronse case 3.000 películas co certame. 'Sirat' é a cuarta longametraxe de Oliver Laxe, producida por Movistar + e El Deseo, a película está protagonizada por Sergi López e Bruno Núñez xunto un grupo de actores non profesionais, como é habitual no realizador franco-galego. A historia escrita por Laxe e Santiago Fillol e unha 'road movie' ambientada en Marrocos, na que un pai e o seu fillo buscan á súa filla e irmá desparecida por festas 'rave' nese país. Dentro desta competición oficial estará tamén o filme 'Romería' rodada por Carla Simón ('Alcarrás') en terras galegas. O festival comezará o vindeiro 13 de maio..
Amplía a nova>>
09/04/2025
Unha empresa xestionará a Galicia Film Comission
A Axencia Galega de Industrias Culturais ven de sacar a licitación por procedemento aberto a contratación do servizo de xestión e promoción da Galicia Film Commission, o que supón un paso máis cara a posta en marcha desta entidade que ven anunciándose desde fai tempo e que o sector audiovisual demanda. Segundo especifica o prego, Agadic contrataría cunha entidade externa todo o desenvolvemento das tarefas da Galicia Film Comission baixo a súa supervisión e mando, incluída a xestión da plataforma tecnolóxica licitada previamente e entregada pola UTE Balidea -Ilux desde o ano 2023. Foi en marzo dese ano cando o entón conselleiro de Educación e Cultura, Román Rodríguez, daba unha rolda de prensa na Cidade da Cultura de Galicia asegurando a inminente posta en marcha da comisión, presuntamente entón con persoal propio da Agadic. Desde a recepción da plataforma tecnolóxica non se tivo máis noticias da GFC ata a publicación desta contratación na Plataforma d Contratos Públicos da Xunta de Galicia. A data de inicio do contrato a licitar de xestión será, segundo os pregos, o vindeiro 1 de xuño de 2025. O contrato terá unha duración inicial de dous anos prorrogables cun valor estimado de 210.928,51 euros sen IVE..
Amplía a nova>>
02/04/2025
Oito proxectos de videoxogos obteñen axudas da Xunta
A Xunta ven de resolver a concesión de 150.000 euros en axudas a oito produtoras galegas de videoxogos a través da súa convocatoria de subvencións para o desenvolvemento do sector. Esta contía investirase noutros tantos proxectos de selo galego co obxectivo de facilitar a chegada ao mercado de contidos feitos en Galicia e no noso idioma, ademais de favorecer a profesionalización e a creación de emprego por parte das empresas que traballan neste ámbito. Catro dos títulos subvencionados pola Consellería de Cultura, Lingua e Xuventude acadaron a axuda máxima de 25.000 euros prevista nas bases: Xerme, que Acariño Games presenta como unha experiencia inmersiva que explora os conceptos de orixe e evolución, ao tempo que convida a unha reflexión sobre o mundo natural; Sandwich Cat, producido por Testaferro a partir da curtametraxe homónima de David Fidalgo; o xogo de fantasía e supervivencia en 2D A nosa fantasía, inserido na serie de proxectos transmedia O noso pasar de Melgo Cinema, e Unicorn Wars, de DEP Games, a partir da longa de Alberto Vázquez gañadora do Goya á mellor película de animación en 2022..
Amplía a nova>>
28/03/2025
Illa Bufarda preestrea o documental Altas luces
A Sala Mozart do Auditorio de Galicia, en Santiago, acolle na tarde deste 28 de marzo a preestrea do documental
Altas luces. A produtora Illa Bufarda proxecta por vez primeira esta produción, coa que obtivo en 2024 un dos premios Luísa Villalta a proxectos pola igualdade que convoca a Deputación da Coruña..
Amplía a nova>>
24/03/2025
O Consello da Cultura galega estreita lazos con Irlanda
Rosario Álvarez, presidenta do Consello da Cultura Galega inicia este 25 de marzo unha viaxe institucional por Irlanda coa intención de abrir vías de colaboración con diferentes entidades da illa. Canda a estes encontros, a institución organiza en Dublín o programa
Encontros atlánticos. Galicia-Irlanda que amosarán a música, a literatura e o audiovisual que se realizan no noso país..
Amplía a nova>>
20/03/2025
A VI Semana do Cinema Galego ofrecerá oito producións recentes no Teatro Colón
A Coruña acollerá do 26 ao 29 de marzo a celebración cinematográfica non competitiva de cine feito en Galicia, que exhibirá o máis salientable da produción audiovisual galega do último ano. Un total de oito filmes, catro longametraxes de ficción e catro longametraxes documentais, serán proxectados no Teatro Colón. A programación estará composta polas películas finalistas aos XXIII Premios Mestre Mateo, que foron seleccionadas polos 500 membros da Academia Galega do Audiovisual como as máis destacadas de entre toda a produción galega do ano anterior. O acceso a todas as proxeccións da mostra será de balde, con entrada libre, por orde de chegada, ata completar a capacidade da sala. Cada unha das proxeccións estará presentada polo equipo artístico da película cun breve coloquio conducido polo programador e crítico Javier Trigales. Con esta sexta edición a Semana do Cinema Galego consolídase como cita imprescindible para coñecer o mellor do audiovisual galego recente..
Amplía a nova>>
19/03/2025
O premiado documental 'Salvaxe, salvaxe' chega aos cines este venres
'Salvaxe, salvaxe', a primeira longametraxe do cineasta Emilio Fonseca (Ourense, 1978), chega ás salas de cine o este venres 21 de marzo despois da premiere co equipo que terá lugar o xoves 20 nos Cines Cantones da Coruña. A partir do venres 21 e ata finais do mes de marzo o documental poderá verse en CineBaix (Sant Feliu del Llobregat), Zumzeig (Barcelona), Cines Babel (Valencia), Cines Embajadores Río (Madrid), Círculo de Bellas Artes (Madrid), Cines Manhattan (Valladolid), Duplex Cinema (Ferrol), no Teatro Colón da Coruña dentro da Semana do Cine Galego 2025, Cines A Xunqueira (Cee), Cines Broadway (Valladolid), Auditorio de Ribeira, Códex (Lugo) e Numax (Santiago de Compostela)..
Amplía a nova>>
