Exposición na Igrexa da Universidade. Fotografía: Xosé Lois Vázquez
As imaxes tiveron un papel fundamental na mobilización social arredor do Prestige. Deste xeito, resultaba inevitable que un proxecto como é Unha gran Burla Negra apostase polo formato de exposición para amosar a produción gráfica que acompañou aquel movemento. Exposicións como Máis Nunca Máis na Coruña e Unha gran Burla Negra. Arquivo Vivo en Santiago de Compostela repasan estes traballos. Achegamos, da man dos seus comisarios, unha selección das pezas máis relevantes destes proxectos expositivos.
Selección de imaxes da exposición Unha gran Burla Negra. Arquivo Vivo
Igrexa da Universidade de Santiago de Compostela. Comisariada porDaniel L. Abel e Miguel Anxo Rodríguez. Ata o 16 de marzo.
Desde o inicio das protestas, colectivos e creadores asumiron que o recurso ao humor podía facilitar a difusión das ideas e incitar á mobiliación popular. Membros dos colectivos Chapapote e de Burla Negra elaboraron este cartel, preparado para ser recortado e espallado polas rúas de cidades e vilas, con figuras alusivas ao mar e ao desastre do Prestige. Se a xestión do accidente foi vista como unha broma (de mal gusto), a reacción tiña que pasar por unha resistencia activa e lúdica á vez.
A produción de elementos comercializables ocupou boa parte dos esforzos de artistas e deseñadores. Esta barralla foi producida a partir da incorporación das imaxes dos políticos do PP con responsabilidades na xestión da catástrofe. Ademais de ser comercializada (dentro do 'merchandising' de Burla Negra) tamén tivo unha versión a escala maior que foi levada nas manifestacións.
Nunca máis colaborou con asociacións de veciños e confrarías nodesenvolvemento de concertos e outras actividades culturais, no tempo que durou a crise do Prestige. Neste cartel anúnciase un concerto en Corme, en homenaxe ás voluntarias e voluntarios que se achegaron a limpar a costa, que contou coa participación de grupos musicais e de teatro de Galicia e outras partes do norte peninsular.
"Un importante grupo de debuxantes e humoristas gráficos uníronse no Colectivo Chapapote, desenvolvendo un intenso traballo no eido da banda deseñada e ilustración. Traballaron desde o humor e a ironía, e cunha vontade de apertura ás colaboracións das persoas que se quixesen sumar á causa. Produciron carteis, editaron publicacións e proporcionaron ilustracións para reportaxes e monografías publicadas en relación coa crise do Prestige.
A exposición leva á Igrexa da Universidade, en Compostela, unha ampla selección de materiais producidos no marco das protestas pola xestión da catástrofe do Prestige, desde carteis e camisetas ata audiovisuais e publicacións. Grazas a un convenio asinado entre a Asociación Unha Grande Burla Negra e a Universidade de Santiago de Compostela, estes materiais van quedar depositados, conformando un arquivo que se espera que siga crecend no futuro. A fotografía é de Xosé Lois Vázquez.
Selección de imaxes da exposición Máis Nunca Máis, crónica popular dun pobo en pé
Palexco. A Coruña. Comisariada por Radio Buguina. Ata o 3 de marzo.
Un proxecto de Radio Buguina, promovido pola A.C. Unha Gran Burla Negra, co soporte do Concello da Coruña. A videoinstalación nútrese exclusivamente dos fondos documentais de Difusora das Letras, Artes e Ideas, que comprende máis de 4.000 fotografías das manifestacións, voluntarios e eventos da época. Na mostra, que se pode ver ata o vindeiro 3 de marzo, este material proxéctase por 20 ollos de luz nun maremágnum de imaxes en movemento. Segundo explica Pepe Galán, coordinador do proxecto, "son fotos realizadas por profesionais e xente en xeral, que mostran parte do estoupido creativo xerado polo movemento cultural e social de Burla Negra e Nunca Máis. Foi un tempo de ferida ecolóxica e carraxe, onde a cidadanía soubo manter o timón da dignidade". A Mostra remata coa edición dun libro que recolle manifestos, poemas e textos, algún deles orixinais, escritos para esta ocasión.
