Música escénica (Tres propostas) Escritor/a: Varios autores

Ed. Universidade da Coruña,
2012 | Teatro

A Biblioteca Arquivo Teatral Francisco Pillado Mayor comprácese en editar, neste novo volume das súas publicacións, tres propostas musicais para a escena, en parcería coa Asociación Galega de Compositores e coa colaboración da Radio Galega, do Conservatorio Profesional de Música da Coruña e, mol especialmente, dos intérpretes vocais e instrumentais que fixeron posíbel a excelente gravación que acompaña este libro.
Preséntanse aquí tres autores con diferentes e diversificadas maneiras de compoñer música escénica. En primeiro lugar, de Julio Montero, editase a obra para cuarteto de corda Un mundo feliz, constituída por unha música simbólica,de ambientación e de recreación dun escenario en que os protagonistas desenvolven a liña argumental da coñecida novela de Aldous Huxley de que parte. En segundo lugar, Paulino Pereiro achega, nas súas tres composicións, tres maneiras diversas de entender a música teatral: O café de espellos constrúese como música decorativa: O paseo das esfinxes combina a aparición directa dunha canción durante a representación coa ambientación da declamación do texto a partir do desenvolvemento de variacións instrumentais do tema; Música teatral prepara a aparición directa da canción, eixo do texto dramático, cunha nova variatio, previa á aparición do tema principal, que Irá, aos poucos, construíndo o tema completo. Finalmente, Juan Pérez Berna preséntanos, na súa versión de cámara, o Villancico Extrafino (Retablo escénico en catro cadros) , con libreto de Miguel Hernández en adaptación para o galego de Pamela Rodríguez, en que se recrean diversas escenas do ciclo de Nadal cunha música minimalista (neo) modal e figurativa.
En fin, só nos resta desexar que estas tres propostas de música escénica poidan facilitar. Nalgunha medida, a traslación estética ou a trashumancia perceptiva –por tanto condicionada e repetida dos lugares porosos que relaciona: in absentia, o do relevo dos textos dramáticos de que se parte e, in praesentia, o da densidade dos revestimentos sonoros que se nos achegan.
[Lapela do volume]

» Título: Música escénica (Tres propostas)
» Escritor/a:
   Varios autores

» Ed. Universidade da Coruña,
» Ano: 2012
» Xénero: Teatro
» CDU: 82-2=134.4
» IBIC: DD - Obras de teatro, textos teatrais
» Coleccion: Biblioteca-Arquivo Teatral Francisco Pillado Mayor
» Pax: 89
» ISBN: 978-84-9749-483-0