07/12/2020
Outórganse os Premios da Cultura Galega 2020
Este sábado a Consellería de Cultura deu a coñecer os galardoados nos Premios da Cultura Galega 2020, no sque se recoñece "o labor creativo de Galicia e a súa expansión nos novos espazos que se abren na actualidade en diferentes ámbitos". Na modalidade de letras é a escritora Ledicia Costas, "unha das escritoras máis lidas e premiadas do panorama literario galego e tamén unha das máis traducidas". No campo das artes plásticas, o premio vai para Xurxo Lobato, "un dos fotógrafos máis representativos da actualidade. A súa obra ofrece unha peculiar imaxe da realidade, un selo persoal que nace dunha mirada subxectiva para ofrecer un diálogo antropolóxico e crítico con diferetnes tempos e estéticas". Nas Artes Escénicas, galardoouse á Federación de Teatro Afeccionado de Galicia (Fegatea). "As agrupacións escénicas locais desenvolveron un circuíto de teatro afeccionado por toda Galicia, ademais de contribuír á proxección da cita anual do teatro galego". No eido da música os premios distinguiron á aCentral Folque pola súa contribución "ao estudo, á promoción e á divulgación da música galega, cubrindo a carencia existente ata o momento nas ensinanzas regradas da nosa música popular". En Audiovisual, o premio vai para Chema Prado, "o director máis lonxevo da Filmoteca Española". En Lingua, recoñeceuse o traballo de Xosé González Martínez, "un dinamizador, no sentido máis amplo da palabra, da cultura e da lingua galegas, tarefa que leva desenvolvendo toda a súa vida en prol da normalización plena en distintos espazos de uso. É, de feito, o creador do primeiro servizo de normalización lingüística de Galicia, no concello de Redondela". No patrimonio cultural, o premio recae na Fundación Penzol, da que "a súa biblioteca e arquivo están considerados como centros de consulta indispensables para os investigadores". E, de final, o premio de proxección exterior foi para Ildiko Szijj, "responsable do Centro de Estudos Galegos en Budapest desde 2014". .
Amplía a nova>>
04/12/2020
A Xunta amplía as capacidades de público en espectáculos en toda Galicia
A piques de chegar á hora da aplicación das novas normativas á medianoite, publicábase no sitio web da Xunta de Galicia un novo número extraordinario do Diario Oficial de Galicia deste xoves recollendo as especificidades das medidas restritivas para o territorio galego. Na orde da Consellaría de Sanidade determínase o concreto nivel en que se atopan os concellos galegos asignando a cada un dos catro niveis actuais medidas restritivas con variación que, no caso da actividade cultural, levan desde un aumento considerable de capacidade de asistentes ata o mantemento de peche das salas de concertos e outros servizos culturais naqueles concellos coa maior alerta. Con estas medidas deixase atrás a limitación anteriormente vixente a 30 ou 60 persoas nos recintos de espectáculos con independencia do seu tamaño ou número de butacas. A clasificación destas zonas será obxecto de continua revisión periódica e a actual, establecida no decreto publicado onte, está vixente ata o vindeiro día 9 de decembro..
Amplía a nova>>
03/12/2020
Estudantes de Comunicación Audiovisual fan un programa televisivo en Internet sobre o sector cultural
Afondar nos efectos que a crise provocada pola covid-19 está a ter nas industrias culturais galegas e dar a coñecer como os diferentes axentes do sector "tratan de sobrevivir e evolucionar nunha contorna tan hostil". Estes son, como sinalan os seus responsables, os principais obxectivos de Somos Cultura, un serie de programas televisivos realizados por alumnado do grao en Comunicación Audiovisual da Universidade de Vigo que difunden a través de Youtube. Segundo informa o Duvi, o proxecto, no que participan 18 alumnos e alumnas, insírese nas actividades da materia Guión, Produción e Realización, que imparte o profesor Paulino Pérez e ten como obxectivo enfrontar ao estudantado á realización "dun programa de televisión, cun formato tipo magazine”, que, sinala, á súa vez, permítalles afondar na situación “dun sector que neste momento o está pasando mal e que ademais é tamén o seu, o da cultura". Ademais dos videos en YouTube manteñen presenza nas redes sociais con perfís en instagram, Twitter, Facebook e Tik Tok..
Amplía a nova>>
30/11/2020
O audiovisual en loito polo repentino falecemento do guionista e docente Daniel Domínguez
O sector do audiovisual lamenta hoxe a perda de Daniel Domínguez (Tui, 1955) que falecía de xeito repentino na madrugada do domingo. Director, guionista e docente, traballo este último que exerceu durante máis de 25 anos, formou parte do equipo fundacional da escola de Imaxe e Son da Coruña entre 1991 e 1998, que hoxe o despedía con tristura lembrando o seu grande carisma e o inesquecible da súa figura como mestre e amante do cinema. “As súas clases de Historia do Cine e Guión serán sempre lembradas como exemplo de paixón e entrega”, lembran desde a EIS. Na súa traxectoria na produción audiovisual o seu traballo coma guionista foi premiado no ano 202 co Premio Mestre Mateo por
Terra de Miranda e está relacionado tamén con títulos tan coñecidos coma
Mareas Vivas, As leis de Celavella, Padre Casares, Miña sogra máis eu,
A vida por diante e a longametraxe
Blanca Madison(Carlos Amil, 2000). Coma director fixo
Río de sombras e
O segredo. Durante gran parte da súa carreira estivo vencellado ao Grupo Voz Audiovisual e escribía no suplemento Fugas do xornal La Voz de Galicia. O pasado venres daba a que sería a súa insospeitada derradeira clase no Máster en Produción Xornalística e Audiovisual da Fundación Santiago Rey Fernández-Latorre. A Academia Galega do Audiovisual tamén quixo sumar o seu pesar ao da familia, amigos e do conxunto do sector por esta desaparición recordando que Domínguez foi “un referente para moitos de nós” e que deixou pegada en varias xeracións de profesionais que asistiron ás súas clases, conferencias e obradoiros. .
Amplía a nova>>
30/11/2020
Premio internacional no festival de Xixón para a película '9 Fugas' de Fon Cortizo
A estrea internacional da película
9 Fugas escrita e dirixida polo vigués Fon Cortizo no Festival Internacional de Cine de Xixón (FICX) saldouse co recoñecemento da cinta como gañadora
ex aequo do premio a Mellor Película xunto co filme polaco
Marygoround de Daria Woszek na sección Retueyos, dedicada ás novas apostas narrativas. Dado que o festival este ano celebrouse virtualmente en liña a película de Fon Cortizo puido ser visionada a través da plataforma FILMIN entre o 23 e o 26 de novembro, chegando a esgotar o número de accesos dispoñibles no seu caso. Coa concesión do premio ampliouse a visualización outros dous días.
9 Fugas, gravada en galego, parte da banda sonora creada por una orquestra de improvisación dirixida da que xurdiron a historia e as imaxes. O filme estrutúrase en 9 capítulos que son vasos comunicantes a través de que flúe un relato. Nestes capítulos temas como a memoria, o tempo e a opresión van entrelazándose compoñendo un relato que busca enganchar nunha tea de araña de historias. En
9 fugas Cortizo conta no reparto con Areta Bolado, Ailén Kendelman, Olga Cameselle, María Roja, Lola Quirós, Alfredo Rodríguez, Noelia Castro e Marta Pérez. Fon Cortizo ten xa no seu haber varias curtametraxes e no ano 2012 gañou o Premio Mestre Mateo a Mellor filme documental por
CEF 100%. O director mandou o seu agradecemento ao certame por medio dun vídeo. .
Amplía a nova>>
30/11/2020
A edición máis virtual de Culturgal fecha a sumar 9.000 reproducións
Novecentas persoas participaron de xeito presencial nas actividades da décima terceira xeira de Culturgal na fin de semana do 27 ao 29 de novembro, esgotando as prazas dispoñibles para grande parte dos eventos do programa. A Feira das Industrias Culturais Galegas contou ademais con 9.000 reproducións dos contidos que retransmitiu en liña a través das súas tres canles de programación. En total foron 70 propostas culturais, 12 cámaras, 20 horas de retransmisión e un equipo de máis de 60 persoas as que compuxeron a xeira máis virtual do evento. .
Amplía a nova>>
23/11/2020
Válidas faise con dous dos galardóns do Carballo Interplay
Válidas foi a grande triunfadora da noite ao se facer tanto co premio á Mellor webserie estatal como co Premio do Público. O proxecto que dirixe Nacho Pérez-Pardo retrata en clave de humor a vida de Victoria Martín (Living Postureo) e Carolina Iglesias (Percebes y grelos), dúas cómicas que fan todo o posible por conseguir notoriedade. O xurado, pola súa banda, outorgoulle o galardón á Mellor webserie en versión orixinal en galego a
Os 20 do XX, proxecto de animación didáctica de Antón Varela emitido en
Praza. O premio de Mellor webserie internacional, pola súa banda, foi para
Subsolo, serie portuguesa que conta un día na vida de cinco adultos novos con Lisboa e a súa situación de precariedade..
Amplía a nova>>
23/11/2020
Os XLIII Premios da Crítica de Galicia celebraron a excelencia da cultura do país
A Asociación Premios da Crítica de Galicia cumpriu este sábado coa súa tradición anual de entrega de recoñecementos da excelencia na que é xa a XLIIIª edición destes galardóns creados en 1978. Os xurados das oito categorías estiveron constituídos este ano por 56 persoas dos distintos eidos da vida cultural galega que participaron nesta toma de decisións sobre as propostas presentadas por editoras, produtoras e outras entidades culturais, para as que este ano se instauraron as video-reunións como formato axeitado ás circunstancias. Con todo, a sala de conferencias do centro social Afundación de Vigo servía para levar a cabo dun xeito presencial esta cerimonia de dar a coñecer os distintos destinatarios dos premios de Creación Literaria, Investigación, Música, Iniciativas Culturais e Científicas, Artes Plásticas, Artes Escénicas, Cine e Artes Audiovisuais e Cultura Gastronómica. Bieito Ledo e Manuel Bragado, presidente e secretario da asociación respectivamente, foron os encargados de ir dando a coñecer as decisións dos xurados para cada unha das modalidades. O acto de lectura das actas e comunicación de premiados fíxose en directo en video en liña e está recollido na canle de YouTube deste premios.
.
Amplía a nova>>
20/11/2020
Culturgal presenta un programa de 70 actividades con 60 horas de retransmisión
Victor López, presidente da Culturgal, Xosé Aldea, director da feira, Jacobo Sutil, director da Agadic, Carme Fouces, concelleira de Cultura de Pontevedra, e Carmela Silva, presidenta da Deputación Provincial, daban a coñecer na mañá deste 20 de novembro o programa da nova edición de Culturgal. A Feira das Industrias Culturais Galegas presentou uns contidos que, na súa maior parte, serán accesibles en liña entre o 27 e o 29 deste mes, cun total de 70 actividades e preto de 20 horas de emisión en cada unha das tres canles temáticas simultáneas dedicadas á edición, a escena e a música. De calquera xeito, pódese participar de xeito presencial na feira, con prazas limitadas e medidas adaptadas á situación sanitaria. Segundo destacou na presentación Jacobo Sutil "Culturgal é punto de inflexión no ano en curso e no que vén, polo que non podía deixar de facerse",mentres a Carmen Fouces apuntou que "Non hai pandemia que poida coa Culturgal"..
Amplía a nova>>
20/11/2020
Carlos Ares e Mamen Quintas primeiros axentes culturais en declarar ante a Comisión de Reactivación do Parlamento
O Parlamento de Galicia reunía onte a Comisión non permanente especial de estudo sobre a reactivación económica social e cultural de Galicia pola crise da Covid-19. Se ben a sesión matinal estaba dedicada a comparecencias sobre a educación con, entre outros, os reitores das tres universidade galegas, na tarde foron convocados axentes do sector cultural para poñer ante as súas señorías as súas situacións e propostas. Mamen Quintas, xerente da produtora audiovisual independente Ficción Producciones, e Carlos Ares ex-presidente da Academia Galega do Audiovisual, socio da produtora Zopilote e guionista fixeron as súas exposicións e contestaron as preguntas das representantes dos partidos da cámara. Nos dous casos as comparecencias facíanse a representación individual, xa que, malia que Ares estaba substituíndo a Berta Ojea, que non puido acudir en representación da Unión de Actores, pero no seu caso non pertencía a esa organización nin actuaba de xeito delegado de ningunha concreta, coma el mesmo quixo aclarar. A súa exposición fóra, iso si, elaborada con múltiples achegas de diversos axentes do sector cultural a nivel persoal ou asociativo, traendo as súas voces e reclamacións ante a mesa da Comisión parlamentaria..
Amplía a nova>>
