Santa, de Asorey, xa é propiedade da Xunta

A Xunta xa pechou a adquisición do patrimonio galego da Casa de Galicia de Montevideo, posto á venda polo estado uruguai tralo embargo dos bens da institución. No lote figuran diferentes obxectos de arte que contaron cunha diferente valoración económica, pero o prezo final pode sorprender a calquera: 18.190 dólares. A peza máis significativa do lote foi Santa de Francisco Asorey, que foi tasada en 6.000 dólares. A obra, unha das máis queridas de Francisco Asorey, pertenceu ao seu autor ata que foi vendida á Casa de Galicia en 1951. A peza retornara por primeira vez a Galicia en 2019 para a exposición "Galicia, un relato no mundo" e espertara un grande interese para o público. Xunto con Santa, o lote inclúe tamén pinturas de Roberto González del Blanco, Colmeiro ou diferente documentación. O goberno galego considera por agora que as obras deben ficar en Uruguai, no contexto da comunidade galega. A documentación será traída a Galicia para a súa dixitalización.