Novas escavacións investigan o depósito de Porto Maior

O pasado 11 de xuño comezaba a nova fase de escavacións no xacemento de Porto Maior, nas Neves. Esta investigación fai parte do proxecto internacional Minho/Miño: Os primeiros poboadores do río Miño, e conta con investigadores das universidades de Lisboa, Porto, Minho e Adelaide (Australia), o Australian Research Centre for Human Evolution (ARCHE) e o Cento Nacional de Investigación sobre la Evolución Humana (CENIEH). A nova etapa nas pescudas quere afondar nas particularidades do depósito e coñecer mellor a distribución dos niveis de ocupación humana no lugar. Desta volta amplíase a área de análise, co que se tentará explicar a función da grande acumulación de ferramentas descubertas no lugar. Os restos localizados apuntan que o depósito conta cunha idade comprendida entre os 300.000 e os 200.000 anos de antigüidade, o que fai del o xacemento con restos de actividade humana máis antigo coñecido en todo o país.