O ciclo Castelao e o seu tempo reflexiona sobre o pensamento e o legado do rianxeiro

A Casa Museo Casares Quiroga da Coruña acolle as actividades do ciclo de conferencias Castelao e o seu tempo. A Fundación Castelao e o Instituto José Cornide de Estudos Coruñeses coordinan este encontro que abordará diferentes aspectos da vida e obra do rianxeiro en sesións que combinan relatorios e mesas de debate.

Henrique Monteagudo abre a iniciativa este 6 de novembro cunha xornada sobre "Castelao: a construción dunha nación". Despois do seu relatorio Ana Romero, Lourenzo Fernández Prieto e Pilar Garcia Negro protagonizarán o debate. "Castelao: Democracia e república" é o título da segunda sesión do ciclo, que se desenvolve o 11 de novembro cun relatorio a cargo de Emilio Grandío e unha mesa na que participan Miguel Cabo, Eliseo Fernandez e Marilar Aleixandre.

Exilio e memoria son os eixes da terceira xornada, o vindeiro día 12, con conferencia de Xosé Manoel Nuñez Seixas e Julian Bustelo Abuín, Miguel Anxo Seixas Seoane e Gonzalo Castro no debate. Finalmente, Ramón Villares correrá coa intervención principal do último encontro, centrado na cuestión "modernidade e cambio no primeiro terzo do século XX". Canda a el, participarán na actividade ese 19 de novembro Rosario Sarmiento, Xosé A. Fraga e Felipe Senén.

O proxecto está financiado pola propia Fundación Castelao e o Concello da Coruña e conta coa colaboración da Secretaría Xeral de Política Lingüística, o Consello da Cultura Galega e a Real Academia Galega.