A segunda edición do Festival Martín Códax de Música ao Vivo comeza hoxe coincidindo co gallo do Diá Europeo da música en Santiago de Compostela. Concertos nas rúas a cargo dos grupos gañadores nas diferentes categorías do certame do ano pasado e coloquios sobre diversos aspectos da industria musical encherán hoxe as rúas da cidade nunha xornada aberta a todo o público. A Praza de Abastos acolle ás 14 horas o concerto inaugural cunha sesión vermú do grupo De Vacas, gañadoras do III certame Premios Martín Códax na categoría de Coros e grupos vocais.
Pola tarde, a partir das 19:30 horas na praciña da Oliveira, terán lugar varios coloquios moderado por Aitana Cuétara, da xunta directiva de MAV (Músicos ao Vivo), arredor dos temas que interesan e preocupan ao sector musical. Patricia Hermida de MMF Spain (Music Managers Forum Spain) e Xurxo Piñeiro de MAV falarán sobre a nova Lei de Espectáculos; Xacobe Martínez Antelo, de MAV Compostela, guiará o debate sobre a situación da música ao vivo en Compostela; e por último, as xornalistas Rocío Castro de Sermos Galiza, Pilar García Rego da TVG, Belén Regueira da Radio Galega e Germám Hermida de Cultura Galega revisarán o tratamento que recibe a música galega nos medios de comunicación. E pola noite, ás 22:00 horas na Praza da Quintana, concerto de Foxy Freire e a continuación sesión de Croma, gañadores nas categorías de rock e electrónica respectivamente. En verán e outono o Festival continuará con citas en distintas localidades do país.
