O mais "in" da nova banda deseñada de autor (5)

Paper Rad, Marc Bell, e Ron Regé Jr. Propoñemosvos un percorrido pola cara máis psicotrónica e `trashŽ da nova xeración de autores canadenses. Se o mundo non paga a pena, alguen terá que inventar outro.

Colectivo Paper Rad ( creado no 2000)

Formado por Jacob Ciocci, Jessica Ciocci e Benjamin Jones e adicado a eidos tan diversos como a pintura, a música, as performances, a animación, o net-art, ou ó que nos ocupa, a banda deseñada, Paper Rad mestura situacións familiares con enfoques inesperados, nunha sorte de psicodélicas historias non-sense que nos remiten paradóxicamente ó máis común.

Graficamente son tan naif como Kitsch, paletas cromáticas imposibles, e unha habilidade debuxística limitada, que sen embargo parece casar á perfección coas súas premisas éticas; son unha sorte de art brut no tempo da música nu-rave. Nas súas propias palabras: "Nos 70 e 80 os debuxos e os produtos electrónicos eran máis grandes e `trashŽ que nunca e deixaban abraiados ós rapaces... Agora eses rapaces medraron e están flipando a todo o resto do mundo usando a mesma estratexia `trashŽ".


Marc Bell (Vancouver, 1971)

Como tantos outros dos autores que dos que temos falado nesta sección Bell é un adito da autopublicación, ducias de títulos como Mojo Action Companion Unit, Gooma, Knoze Clipppah! o corroboran.

Cun estilo deudor do Crumb máis psicodélico ou de Gary Panther, Marc Bell constrúe irreverentes historias psicotrónicas con bizarros personaxes normalmente en extravagantes situacións. A súa posta en páxina é ás veces tan complexa e rica que ten un valor plástico propio, moitas das súas páxinas son exhibidas por separado como arte plástica, aínda que hai que dicir na súa contra que por esta razón pode resultar moi denso ou directamente ilexible, o certo é que non estou seguro de que iso lle preocupe o máis mínimo a el.

Ron Regé Jr. (Quincy, 1969)

1991 sorprendeu a Ron traballando nunha fotocopiadora o que lle permitiu comezar niso que os americanos chaman mini-comics (fanzines). Dende daquela ata agora ten publicado en lugares tan diversos como o Kramer’s Ergot, The New York Times, e tirou unha antoloxía de seu chamada Skibber Bee-Bye.

O seu traballo de estilo `brutŽ mais preciosista tenlle valido as louvanzas de `popesŽ como Chris Ware, que di del: "Ron Regé Jr. é probablemente o mellor novo valor dos cómics no que podo pensar, o seu traballo afonda na tradición dos pioneiros como Herriman, Sterret, McCay, et al, ten reinventado o medio para que case coa súa propia visión idiosincrática: os seus aparentemente simples pero complexos debuxiños e liñas semellan afromar da mesma esencia da forma: son cálidos, divertidos, tristes, intelixentes, estúpidos - e o mellor de todo, vivos. O seu traballo deberían pechar todas as bocas que din que as tiras están mortas".

Complexas pero lexibles postas en páxina, un persoal mundo e estilo, historias de moi diverso calado e intención, a pesar de que Skibber Bee-Bye non me pareceu para tanto, paga pena seguir o traballo deste xoven hippy autor de cómics e músico de Lavender Diamond.