inicio / colaboradores / Novenoscopio por Miguel Porto Novenoscopio

Conversas (im)posibles 1: Crumb e Zappa

Imaxina que estamos a mediados dos setenta nun remoto lugar dos USA. Imaxina que dúas iconas da contracultura americana se encontran: O historietista Robert Crumb e o rockeiro Frank Zappa.

Novenoscopio

24 / 8 / 2005

Chuza del.icio.us technorati

Ano 1976, un bar nunha pequena vila do medio oeste dos EEUU. Un home de personalísimo bigote e aspecto estrafalario entra no lugar; a clientela local, desde a barra, non lle quita ollo. Senta na única mesa xa ocupada, nela ri só outro home, apocado, nervioso, con voz nasal, bigote e gafas. Dous grandes xenios da contracultura americana, de vidas ás veces paralelas, falan por primeira vez.

Os bos vellos sons.

Frank Zappa: Robert Crumb supoño.

Robert Crumb: Traes o vinilo?

FZ: Aquí está, "Pan American Blues" de Bailey. Unha xoia, ten un dos seus mellores solos de harmónica.

RC: Non hai nada como estas vellas gravacións, se queres máis tarde na casa amósoche a miña colección de 78 rpm.

FZ: Claro, prefiro o R&B dos cincuenta, pero por que non? Seguro que tes máis dunha marabilla.

I left my heart in San Francisco.

RC: Quen ía dicir que un deses músicos de San Francisco puidera ter tan bo gusto?

FZ: Frisco? Trabúcaste, nunca vivín alí.

RC: Non? Eu si, un sitio moi estresante, por iso me mudei. De todos os xeitos a túa música é tan ruidosa como a deles.

FZ: Ha ha. Non creo. Nada me une a eses panocos. Sen embargo ti si que fuches parte do movemento hippy, non si?

RC: Cando vin a Frisco atraído polo sexo libre e as drogas era un idealista, pero dinme conta de que non sirvo para seguir ningún dogma.

FZ: Ou sexa que fuches parte do experimento.

RC: Uh?

FZ: Estou convencido de que a explosión psicotrónica de Frisco non foi máis que un experimento do goberno para probar o LSD en grandes poboacións.

RC: Nese caso terei que darlles as grazas

Ao outro lado do espello.

RC: No 65 estiven metidísimo e foi nesa etapa que creei todos os meus personaxes máis famosos, o ácido cambióu a miña visión.

FZ: Moitos din iso. Eu creo que é malo. Non digo que ninguén deba tomalo nin nada diso, pero na miña banda está prohibido.

RC: Oín esa historia. A xente de Frisco dicía que eras un tipo rancio, por iso tamén e por ter montado a túa discográfica. Dicían que pasaras ao inimigo.

FZ: Se a xente da miña banda non pode tomar drogas é porque eu lles pago 200 $ á semana para traballar con profesionáis. Tes falado con alguén que estea colgado? Non teñen nada que dicir. Son xente morta...

Autoeditores.

FZ: ...Sobre a discográfica, que ten de malo querer tocar o que me gusta? Sendo o meu propio xefe non teño nin censuras nin presións, podo facer o que me pete.

RC: Entendo o que dis. Ese é o motivo polo que nós facíamos fanzines como Zap! ou Head Comix. Ademáis, as discográficas Os de Columbia escarallaron o meu traballo para o disco da Joplin Cheap Thrills, non teñen nin idea.

FZ: Cheap Thrills sóame he he. Que me vas contar? Precisamente estou tendo problemas agora coa Warner. Comparto a túa idea de integridade profesional.

Baixo a sombra da EC.

RC: Por ela rexeitei unha suculenta oferta do Playboy que me chegou a través do meu colega Harvey.

FZ: Kurtzman?!!! Sempre fun un fan da EC! Aqueles cómics dos anos 50: terror, crime, bélicos, eran magníficos. Se non fose polo selo "Comics Code" co que as editoriais comezaron a autocensurarse!!!

RC: Si, tenme axudado moito, estiven a piques de publicar na súa revista Help! Pero cheguei xusto o día que pechaban.

FZ: Falando de pechar, parece que nos botan, que che parece se me achegas a esa granxa túa e me ensinas iso?

RC: Keep on truckin, nese caso.

Artigos anteriores :

Ligazóns

Zappa visto por Crumb

Extensa páxina sobre Zappa en castelán

O museo Crumb

A páxina oficial de Crumb

Outras colaboracións

Atrapade o mensaxeiro
por Jose Lens

Entre as viñetas
por Henrique Torreiro

Puntadas do Xastriño
por Xastriño

A banda de La Opinión
por Diario La Opinión

Os dados do reloxeiro
por Xurxo Mariño

Melodixit
por Melo

anteriores colaboracións

Agardando as lagarteiras
por Rosa Aneiros

Novenoscopio
por Miguel Porto

Cartas Marcadas
por Xavier Queipo