A Semana Internacional de Cine de Autor de Lugo, adiada por mor da situación sanitaria, regresará á cita anual co público cinéfilo na súa 42ª edición do 23 ao 28 de novembro. Será a través dunha carteleira de máis de 100 longas e curtametraxes procedentes dunha ducia de países, que poderán verse en seis espazos da cidade: Auditorio Gustavo Freire, Salón de Actos da Deputación, o Museo e a Biblioteca provinciais, o Vello Cárcere e o Vicerreitorado da Universidade. A sección de Cine Galego contará con 28 filmes. Luis Tosar e a protagonista de O que arde, Benedicta Sanchez recibirán sendas homenaxes que inclúen as proxeccións da película de Óliver Laxe e de Quien a hierro mata, protagonizada por Tosar. O paseo do Cine inaugurado o pasado ano ampliarase cunha placa co nome do propio Tosar e outra en homenaxe á actriz Carmen Correa. Coma novidade o festival ofrecer tamén sesións de cine nos locais de Aspnais e fóra de Lugo nas prisións de Bonxe, Monterroso e Teixeiro, unha iniciativa para a que contan coa colaboración da asociación Concepción Arenal e de Institucións Penitenciarias.
Con motivo dos actos organizados en Lugo polo Día Internacional da eliminación da Violencia contra a Muller, o 25 de novembro, a Casa da Muller vai poñer en marcha unha serie de accións englobadas en torno a un concepto que é o de INVISIBLES, adicado a dar visibilidade a mulleres e dar a coñecer e de recuperar a súa historia. Neste segundo ano que se leva a cabo este programa inclúese na súa proposta como novidade o Festival Cinema Mulleres - FILMU - que se celebrará do 25 ao 29 de novembro nos cines Códex, no que se presentarán películas feitas por mulleres e se realizarán charlas con cineastas invitadas, se presentará un Decálogo de como ver cinema en igualdade e se concederán os premios NOVA ONDA ás películas que, por su calidade e pola súa visión, fan unha mellor representación da muller e as súas situacións. Trinta lumes (Diana Toucedo) , A estación violenta (Anxos Fazáns), Os fillos da vide (Ana Domínguez) e La isla de las mentiras (Paula Cons) son as producións galegas que se poderán ver nesta primeira edición do festival ademais de outras producións internacionais.
