Fragmento da exposición sobre memoria epidémica do AHUS
A memoria epidémica de Galicia a través dos fondos do arquivo histórico universitario é o título da exposición que publicou en liña esta semana esta entidade dependente da Universidade de Santiago. A mostra fai un repaso das diferentes epidemias que sofreu o noso país entre os séculos XVI e XX "a través dunha selección de 50 documentos de tipoloxía moi variada". Nos mesmos, segundo explica a presentación do proxecto, pódense atopar "testemuños escritos das consecuencias dos distintos brotes epidémicos que tantos estragos causaron no noso territorio, e das medidas de prevención e hixiénicas que adoptaron as autoridades da época".
Tamén a Deputación da Coruña publicou, a coincidir coa celebración o 9 de xuño do Día dos Arquivos, unha selección de documentos do Arquivo Provincial, entre eles, as cartas manuscritas de Juana de Vega tras a epidemia de cólera que afectou a cidade da Coruña en 1853. A entidade custodia ademais outro documento de grande importancia na historia epidemiolóxica mundial, como é o Libro de Expósitos da Expedición Balmis, que recolle os nomes e datos dos nenos que en 1803 levaron dende A Coruña a vacina da varíola a América.
