Un repositorio documenta a historia das loitas estudantis en Compostela

O grupo de investigación Histagra, en colaboración co Arquivo Histórico da Universidade de Santiago, presentaba na mañá deste 11 de febreiro o proxecto DOAME: Documentación da Oposición Antifranquista e Movemento Estudantil da Universidade De Santiago. A iniciativa pretende "recoller, catalogar e conservar os materiais xerados polo estudantado compostelán" para xerar un fondo documental no que se atope "toda a información pública e privada xerada polo movemento estudantil entre 1960 e 2000: pasquíns, notas de prensa, discursos, apuntes varios, follas voandeiras, gravacións, fotografías e adhesivos e aqueloutros elementos, todos relacionados co movemento estudantil e a súa historia".



Polo momento, e segundo adianta Histagra, o repositorio comprende o Fondo Rodríguez Holguín, con material das asambleas dos CAF dos anos oitenta e principios dos noventa; o fondo Martínez Rivas, con información desta mesma organización e das eleccións da Universidade de Santiago; o fondo Monterroso Devesa, con documentos políticos e de propaganda do PSG; o fondo Fernández Prieto, centrados nos anos oitenta e organizacións como CXTG, CIG, SGEI, Adiante e CAF e, finalmente o Fondo García del Río, con xornais clandestinos do PCG datados nos setenta.

O grupo Histagra sinala que a recolla de material, dispoñible ao público no Arquivo Histórico da Universidade, está aberto e que calquera persoa pode contribuír a este fondo con novos documentos.