Naceu en 2004 como Festival Alternativo de Xinzo e durante catro anos así seguiu ata que marchou de Xinzo a Ourense para chamarse Festival Alternativo da Xuventude mantendo ao seu apelativo no acrónimo FAX na súa derradeira edición antes de desaparecer. Agora, o evento renace no seu berce orixinario na capital da comarca da Limia e faino para o vindeiro 5 de agosto cun cartel de artistas galegas encabezado por Sés e no que tamén estarán Eladio y los Seres Queridos, Coanhadeira e Habitación Vudú. O evento, que comezará ás 20:30 horas, está pensado como ferramenta de promoción turística da Limia para esas datas do verán e parte dos 8 euros que custa a entrada doarase á asociación Limisi, que traballa na comarca para a mellora das condicións de vida das persoas con discapacidade intelectual.
Por outra banda, cando faltan poucos días para o comezo en Caldas do festival PortAmérica, o Concello de Nigrán ven de anunciar o cartel artístico completo do evento que o substitúe na programación de verán nigranés, o Vive Nigrán, creado para substituír o PortAmérica e que se presenta como Picnic Pop Festival no entorno da Praia América para o 26 e 27 de agosto. As primeiras confirmacións do festival foron o dueto catalán Las bictecs, Joe Crepúsculo, Viva Suecia e o novo proxecto Basanta, aposta local. Tamén estará Da chick, e a nova formación de Amparo Llanos (Dover), New day. O folk-pop de Os Amigos dos Músicos, as rancheiras e corridos dos vigueses Los Duques de Monterrey e o R&B e hip-hop contemporáneo baixo a vangarda dixital de BFlecha, completan o sabor galego do festival. Incluído no circuito Rías Baixas Fests, Vive Nigrán será a última parada das 8+1 que patrocina a Deputación de Pontevedra.
