A última viaxe e outros relatos Escritor/a: Alberto G. Aneiros

Ed. Baía Edicións,
2012 | Narrativa

Esta nova obra narrativa de Alberto G. Aneiros componse de 8 relatos breves e outro máis extenso –o que dá título a obra–, en forma de diario de viaxe, que case podería considerarse unha novela curta. A través da súa lectura, coñeceremos un insólito testemuño directo de abusos sexuais; fatais atraccións e rexeitamentos entre mozas e mozos enleados; malos tratos machistas –e clasistas– nunha situación inesperada; a falsa amizade, o egoísmo desapiadado dalgunha xente nova; un sindicalista que sufriu represalias contando experiencias persoais e certas atrocidades do réxime franquista; a represión e castigo militares dun recruta apaixonado polo canto, que non pode lerse –ou oírse– sen ironía dramática; unha curiosa apoloxía dunha profesión macabra; o progresivo illamento social e a decadencia dun pobre home rico de vila; os conflitos e desgrazas dunha parella nunha viaxe pola India… Todo iso se vai debullando nos diversos textos narrativos que conforman a obra. Algúns dos seus personaxes móstrannos trazos morais autenticamente monstruosos, comportamentos irracionais, vicios perversos ou paixóns destrutivas que non poden senón derivar en dramas humanos, demasiado humanos... Agás nunha das historias, o narrador é sempre un dos protagonistas principais que en primeira persoa conta, sofre e coñece directamente o acaecido, o que permite mesmo unha lectura dramatizada dos mesmos. A pesar da tristeza sen conto da maioría dos feitos narrados, nalgúns dos relatos –como Desafinado, O que un vello sepultureiro dixo…, Fermín o Señorito– non faltan certas doses de humor.
[Presentación editorial]

» Título: A última viaxe e outros relatos
» Escritor/a:
   Alberto G. Aneiros

» Ed. Baía Edicións,
» Ano: 2012
» Xénero: Narrativa
» CDU: 82-3=134.4
» IBIC: F - Ficción e temas afins
» Coleccion: Baía Narrativa
» Pax: 158
» ISBN: 978-84-9995-040-2