Indignádevos! Escritor/a: Stéphane Hessel
Tradutor/a: Fernando Moreiras Corral

Ed. Faktoría K de libros,
2011 | Ensaio e Investigación

“...Facemos un chamamento ás novas xeracións para revitalizaren e transmitiren o herdo da Resistencia e os seus ideais. Nós dicímoslles: tomade o relevo, indignádevos! Os responsábeis políticos, económicos e intelectuais, e o conxunto da sociedade, non deben renderse nin deixarse amedrentar pola actual ditadura internacional dos mercados financeiros, que ameaza a paz e a democracia”.

“Indignádevos!”, o opúsculo de Stéphane Hessel do que se venderon máis de dous millóns de exemplares en Francia, tamén se pode ler en galego. O escritor Manuel Rivas asina o prólogo desta obra directa, reivindicativa e axitadora, cuxo autor, un veterán supervivente da barbarie nazi, se dirixe -aos seus recios 93 anos- á sociedade en xeral, e á mocidade en particular, para que reaccione ante a inxusta realidade social, económica, política e medioambiental.

“...O primeiro valor do texto é ese rescate das palabras. Das palabras que denuncian o espolio da condición humana, a subtracción dos avances e conquistas sociais. E das palabras que nos convocan, que nomean, como a liberdade e a xustiza, os máis preciosos dons, e que constitúen o núcleo programático do que poderiamos chamar partido da humanidade. Esa dobre condición, a de denuncia, mais tamén de enerxía alternativa, é o que sitúa a Indignádevos! na estirpe dos mellores textos vindicativos, ese tipo de epístolas necesarias que a humanidade se dirixe a si mesma en intres históricos...”. (Manuel Rivas).

Para Stéphane Hessel sobran os motivos para chamar á indignación colectiva, á desobediencia e á resistencia. Non contribuiu á loita que permitiu acadar tantas conquistas sociais na segunda metade do século pasado, para que todos eses avances se derrubaran dende a década do 2000 en diante. O autor culpa ao poder financeiro de devalar o equilibrio da democracia moderna, con todos os seus valores e principios, provocando unha crise no mantemento do estado do benestar, a desconfianza na independencia da prensa, unha crecente fenda entre os máis podentes e os máis necesitados, e os dramas humanos derivados dos conflictos internacionais.

Fronte ao egoísmo e á competitividade, Hessel entrégalles aos lectores as bandeiras da liberdade e do compromiso. As súas palabras, cargadas de esperanza e de insurrección pacífica, son o antídoto contra a indiferenza.
[Presentación editorial]

» Título: Indignádevos!
» Escritor/a:
   Stéphane Hessel
» Tradutor/a:
   Fernando Moreiras Corral

» Ed. Faktoría K de libros,
» Ano: 2011
» Xénero: Ensaio e Investigación
» IBIC: DNF - Ensaios literarios
» Coleccion: Ágora K
» Pax: 48
» ISBN: 978-84-15250-06-7