Milu Escritor/a: Manuel Rivas
Ilustrador: Aitana Carrasco

Ed. Kalandraka Editora,
2010 | Infantil-Xuvenil

“Milu” relata as vivencias dunha nena en apuros. Cando o seu pai deixa de cantarlle cancións e a súa nai deixa de ter expectativas, unha pequena televisión convértese na súa única compaña. Milu é a voz de moitos nenos e nenas que padecen situacións de desvantaxe social e non poden gozar do seu dereito a vivir en familia. Pero a súa historialémbranos que hai lugar para a esperanza.

Este ‘libro solidario’ doa o 10% das súas vendas á Fundación Meniños, promotora desta edición, para que os nenos e nenas que o precisen poidan ter un futuro mellor. Meniños é unha entidade de acción social sen ánimo de lucro que traballa a prol do benestar da infancia e da adolescencia. A través de programas de intervención social, trata de impulsar unha cultura do bo trato á mocidade, fomentando o seu protagonismo e a súa participación como suxeitos activos de dereitos.

Manuel Rivas, que lle cede os seus dereitos de autor desta obra á Fundación Meniños, crea un relato tenro e sensible que reflicte a indefensión de Milu ante os problemas dos seus pais. Pero malia a tristura, tamén plasma as ilusións da nena e a súa idea da felicidade: “...Ver rir á xente que queres”. As ilustracións coloristas de Aitana Carrasco -que colabora coa Fundación Meniños cedéndolle a imaxe da protagonista- mesturan estampados, texturas e gravados antigos, creando ambientes realistas con elementos oníricos.
[Presentación editorial]

» Título: Milu
» Escritor/a:
   Manuel Rivas
» Ilustrador:
   Aitana Carrasco

» Ed. Kalandraka Editora,
» Ano: 2010
» Xénero: Infantil-Xuvenil
» CDU: 82-93=134.4
» IBIC: YF - Ficción e historias reais infantís e xuvenís
» Pax: 48
» ISBN: 978-84-8464-735-5