Vogar de couse Escritor/a: Alexandre Nerium

Ed. Espiral Maior,
2003 | Poesía

O poemario Vogar de couse é a metáfora da singradura existencial humana, desde a infancia á irremediable destrucción na vellez, pasando pola adolescencia e a madurez con (des)amor e soidade. A implacable clepsidra das estacións e dos meses do ano van marcando o ritmo e o inevitable final da humana singradura. (...)
"Vogar de couse" é unha homenaxe a Fisterra, ó seu mar e á súa xente, á que traballaba coas pezas do xeito ou con liñas en chalanas e en bucetas onde as bravas augas obrigaban a ter xente que vogase de proa, da carto, de medio e de couse. Non son as tranquilas augas dunha ría como a da Arousa, con domas de tope e con polbeiras domas de escarva, con ghaleóns que transportaban peixe, leña ou barro e con pailebotes. Son as augas dunha costa dura para o traballo no mar como as da costa dos mariñeiros portugueses da marabillosa prosa de Raul Brandao.
Alexandre Nerium non fai neste seu primeiro poemario édito unha crónica da xente do mar de Fisterra, senón que transmite a súa propia vivencia dese mar. É o mar no que el medrou e morou, o mar que foi o seu medio de vida e que quere que o siga sendo. O mar que lle permite seguir soñando, a pesar das cíclicas catástrofes que afectan Fisterra e a batida e castigada Costa da Morte. Onte o Casón, hoxe o Prestige ¿e mañá? .
Ademais do mar fisterrán, en "Vogar de couse" están os mares poéticos de Manuel Antonio e de Bemardino Graña, de Méndez Ferrín e de Avilés de Taramancos, de Xohana Torres e de Ana Romaní, de Rafa Villar e de tantos poetas con mar e sen mar ÓS que Alexandre Nerium quere homenaxear neste libro coa introducción nos quintetos dalgún verso deses poetas ou ben con varios versos como encabezamento de cada un dos cinco libros do poemario. "Vogar de couse" é unha homenaxe á poesía dos anos 80 e á dos 90 (a dos "vellos" e a dos "novos"), é unha homenaxe a Manoel Antonio, creador dun mar fantasmagórico (e surrealista como os cadros de Urbano Lugrís) con termos náuticos técnicos e co léxico dos mariñeiros de baixura de Rianxo e do Mar da Arousa.
[fragmentos do limiar de Francisco Fernández Rei]

» Título: Vogar de couse
» Escritor/a:
   Alexandre Nerium

» Ed. Espiral Maior,
» Ano: 2003
» Xénero: Poesía
» CDU: 82-1=134.4
» IBIC: DC - Poesía
» Coleccion: Espiral Maior Poesía
» Pax: 87
» ISBN: 84-95625-80-6