Once máis 15 Escritor/a: Varios autores

Ed. Edicións do Cumio,
2009 | Poesía

Edicións do Cumio vén de publicar Once máis 15 un traballo que conxuga a poetas e músicos. Trátase dun libro con CD froito da unión entre once poetas galegos de todos os tempos e quince grupos da escena musical actual. Nesta suma, versos que van dende Rosalía e Curros ata Antón Lopo e Daniel Salgado convértense en cancións por virtude dun elenco variado de músicos no que conviven a electrónica, o pop, o rock de diversa inspiración e case todos os estilos imaxinables. O libro recolle as versións orixinais dos poemas, aquelas que serviron como punto de partida para as composicións dos músicos, así como as biografías dos autores. Por parte dos músicos, a edición aporta imaxes dos artistas e bandas ás que acompaña un texto de presentación de cada unha delas.
A iniciativa parte da asociación MusicARTE, e está coordinada polo músico Miguel Alonso. Nace coa intención de ser unha mostra do fecundo panorama musical que nos rodea e que, nesta ocasión -que non é a primeira para moitos destes músicos-, toma da man o xénero máis prolífico das nosas letras para recuperar ou recoñecer as súas palabras como unha parte fundamental da nosa bagaxe.
A música corre a cargo de zimmer103, Miguel Alonso, Ataque Escampe, Miguel A Suárez, Xurxo Mares, Fanny e Alexander, Anxo Rei, Roberto Sobrado e banda, Snail, Meiga do Norte, Julian Ross, David Taboada, Elanor, Fucoxabier e Nao. Os poemas escollidos pertencen a Alfonso Pexegueiro, Álvaro Cunqueiro, Antón Lopo, Celso Emilio Ferreiro, Daniel Salgado, Darío Xohán Cabana, Grupo Rompente, Luis Pimentel, Manuel Curros Enríquez, Manuel María, e Rosalía de Castro.

[Presentación editorial]

» Título: Once máis 15
» Escritor/a:
   Varios autores

» Ed. Edicións do Cumio,
» Ano: 2009
» Xénero: Poesía
» CDU: 82-1=134.4
» IBIC: DC - Poesía
» Pax: 64 + CD
» ISBN: 978-84-8289-270-2

» Lecturas: Once máis 15