Antoloxía consultada da poesía galega 1976-2000 Escritor/a: Varios autores
Coordinador editorial: Arturo Casas

Ed. Tris Tram,
2004 | Poesía

Este volume de características atípicas dentro do sistema editorial é o produto dun traballo realizado por Arturo Casas que someteu a consulta por votación a selección dos autores e os textos que aparecen na obra. Hai máis de tres anos que este escritor e profesor universitario de Teoría da literatura e Literatura comparada comezou a facer as súas consultas entre especialistas, escritores, editores, críticos, etc. De perto de duascentas consultas realizadas pedindo unha escolla de 15 autores e 10 libros da poesía galega editada entre 1976 e 2000, Casas recibiu resposta a noventa e sete delas. O resultado final deste proceso é este volume cunha selección de vinteseis autores e vintecinco obras, os máis votados nas dúas categorías respectivamente.
O libro inclúe un amplo limiar do coordinador editorial relativo ao proceso de consultas, o seu método e os seus resultados, tamén inclúe os listados de obras e autores, biografía dos autores,bibliografía, análises sobre cada autor e a súa obra e unha selección de dezaseis textos de cada un deles. A antoloxía presenta textos de Álvaro Cunqueiro, Manuel María, Luz Pozo Garza, Uxío Novoneyra, Antón Avilés de Taramancos, Xohana Torres, X.L. Méndez Ferrín, Bernardino Graña, Arcadio López-Casanova, Salvador García-Bodaño, Alfonso Pexegueiro, Xavier Seoane, Xulio L. Valcárcel, Pilar Pallarés, Manuel Rivas, Xavier Rodríguez Baixeras, Manuel Álvarez Torneiro, Manuel Forcadela, Xosé María Álvarez Cáccamo, Ramiro Fonte, Miguel Anxo Fernán-Vello, Eusebio Lorenzo Baleirón, Ana Romaní, Chus Pato, Lois Pereiro e Olga Novo.

» Título: Antoloxía consultada da poesía galega 1976-2000
» Escritor/a:
   Varios autores
» Editores/as literarios:
   Arturo Casas

» Ed. Tris Tram,
» Ano: 2004
» Xénero: Poesía
» CDU: 82-1=134.4
» IBIC: DC - Poesía
» Pax: 712
» ISBN: 84-89377-46-4

» Crítica: Cinco razóns
» Lecturas: Antoloxía consultada da poesía galega 1976-2000 : Fragmentos do Limiar