Estás na lúa Tradutor/a: Laura Almazán
Escritor/a: Carmen Montalbán
Ilustrador: Pilar Millán

Ed. Kalandraka Editora,
2008 | Infantil-Xuvenil

-A túa avoa perdeu a cabeza -díxome aquel día a tía Fatma, cando volvín da escola. Á vez que poñía as sandalias, sacudiu o meu coxín e achegoume o prato. Logo saiu. Daba uns pasos tan rápidos, que a area que levantaba do deserto comezou a flotar na miña sopa e a pegarse entre os meus dentes. Porque, como é natural, eu tiña a boca aberta. Quería pedirlle á tía Fatma que repetira en hassania, o noso idioma, iso de que a avoa perdera a cabeza. Tía Fatma a penas sabía español. Era raro que non se trabucara. Diría «cabeza» onde tenía que dicir «teteira», por exemplo.

Baraka é unha nena de doce anos que vive nunha tenda do deserto coa súa nai, as súas tías e a súa avoa Bahía. A enfermidade do Alzheimer comeza a arrincaríle a esta última as súas lembranzas. Ese terrible mal simboliza tamén o esquecemento que se cerne como unha ameaza sobre o seu pobo: expulsados hai máis de 30 anos do Sahara Occidental, habitan na inhóspita Hamada arxelina e só os anciáns sinten o baleiro que deixa o desterro da súa patria e o desarraigo; os novos coñécena de oídas porque endexamais a pisaron.
Bahía légalle á súa neta unha herdanza inmaterial de valor incalculable: a súa memoria, un elemento que actúa como fío argumental do relato, ao que se engaden outros aspectos, como a importancia da transmisión oral da cultura, as relacións familiares, a amizade, ou o contraste entre a vida precaria nos campamentos de refuxiados e as comodidades do mundo desenvolvido.
Carmen Montalbán plasma nesta historia a fonda impresión da súa estanza en Tinduf, a fascinación pola paisaxe do deserto, a hospitalidade da súa xente. O resultado, unha obra comprometida no fondo, sensible na forma, didáctica no seu percorrido literario polo mundo, tenra polo vínculo creado entre neta e avoa; un libro que entra polos sentidos, como o té: suave, amargo e doce, como o amor, a vida e a morte.
As acuarelas de Pilar Millón aportan calidez e colorido, transpórtannos ao reino da area, aos seus espazos e costumes; mais tamén ao mundo das emocións, os soños e os símbolos evocadores, como a Lúa.
[Presentación editorial]

» Título: Estás na lúa
» Tradutor/a:
   Laura Almazán
» Escritor/a:
   Carmen Montalbán
» Ilustrador:
   Pilar Millán

» Ed. Kalandraka Editora,
» Ano: 2008
» Xénero: Infantil-Xuvenil
» CDU: 82-93=134.4
» IBIC: YF - Ficción e historias reais infantís e xuvenís
» Coleccion: Seteleguas
» Pax: 112
» ISBN: 978-84-8464-673-0