A pel fría Tradutor/a: Mercedes Pacheco
Escritor/a: Albert Sánchez Piñol

Ed. Ézaro Ediciones,
2007 | Narrativa

Tralo éxito obtido en Cataluña, considerada como a novela estrela da literatura catalá actual, Ézaro Edicións edita en galego o best seller de Albert Sánchez Piñol “A pel fría”, traducida polo Premio á Tradución de 2005, Mercedes Pacheco.

A obra, que figura desde os últimos anos nas listas dos libros máis vendidos, converteuse no título máis traducido da literatura catalá actual, a unhas 30 linguas, a última ao chinés.

Agora, por fin, desde o mes de outubro, poderemos gozar desta obra, que aseguramos non deixará indiferente a ninguén, en galego.

En “A pel fría” encérrase unha profunda crítica sobre a sociedade humana. Trátase dun relato sobre o poder, e o seu efecto corrosivo sobre as persoas, que se mostra baixo a inocente aparencia da historia fantástica de dous homes que intentan sobrevivir nunha illa deserta, soportando o ataque de monstruosas criaturas mariñas que só queren destruílos.

“A pel fría” parte dun relato simple, que non é outra cousa que a metáfora que lle permitirá elaborar un detallado mapa da natureza humana, dos odios e paixóns que nos dominan, e do moito de irracional que hai no noso comportamento. Piñol manexa unha prosa clara, aditiva, universal, rica en metáforas que buscan, xunto ao texto, a bipolaridade do sentimento e o facer humanos. En varias ocasións comparouse esta obra coa de autores como Conrad, Stevenson e Lovecraft.

Ademais de escritor, Albert Sánchez Piñol (Barcelona, 1965) é antropólogo, vocación que se transparenta ao longo de toda a novela. publicara anteriormente o ensaio “Pallasos i monstres” sobre oito ditadores africanos e a selección de contos “Lles edats d'or”. Destaca tamén o éxito obtido coa súa segunda novela “Pandora no Congo”, da que xa se venderon os dereitos de tradución a oito linguas.

[Presentación editorial]

» Título: A pel fría
» Tradutor/a:
   Mercedes Pacheco
» Escritor/a:
   Albert Sánchez Piñol

» Ed. Ézaro Ediciones,
» Ano: 2007
» Xénero: Narrativa
» CDU: 82-3=134.4
» IBIC: F - Ficción e temas afins
» Pax: 235
» ISBN: 978-84-935134-1-2