Ciclo de Marte Escritor/a: Millán Picouto

Ed. Linteo Ediciones,
2007 | Teatro

O colapso ambiental e social, a guerra e a degradación inaudita (desde a época das estatuas á dos caníbales) do laborioso pobo escultor que habitou a illa máis solitaria do mundo, configuran o tráxico asunto da TRILOXÍA DA ILLA DE PÁSCOA, fundamento de Ciclo de Marte. O tema xeral deste ciclo é o conflito cosmolóxico orixinado pola autoafirmación posesiva da vida, coa súa ambición, agresión e belicosidade postas ao servizo da loita contra a oposición que a refrea. ILLA DE PÁSCOA I: ATÁN mostra nun inestable apoxeo o pobo pascoense, composto por dúas nacións, os orellas longas e os orellas curtas, cuxa integración imperfecta aparece agravada pola hexemonía despótica dos primeiros e a común escasez de recursos. En ILLA DE PÁSCOA II: IKO os escultores, mudados en gardiáns, penosamente custodian unha orde social imposta polas armas de pedra, na que a fame vén decimando unha poboación abocada ao exilio polo océano incerto, á pillaxe e á desesperación. ILLA DE PÁSCOA III: OROROINA presenta a miseria alucinada dos restos do antigo pobo escultor nunha terra sen árbores e nos extremos da subsistencia. Atordados polo presente inhóspito e o medo aos espectros dunha historia homicida, homes e mulleres rosman nunha cova a súa prostración reducidos a un fato de antropófagos. OS GUERREIROS CELESTIAIS, comedia fantástica, é a viaxe iniciática dun xefe samurai que cos seus homes se apresta a expiar a súa contribución inconsciente ao caos do Imperio, mediante a liberación dunha princesa e a adquisción das virtudes do desprendemento e da compaixón. Por fin, a miscelánea ASTEROIDES, integra pequenas pezas de tons, argumentos e escenarios diversos.
Unha obra dramática en verso, inusual no panorama das letras galegas, e incluso hispánicas, chea de forza, esplendor verbal e significación.
[Contracapa do libro]

» Título: Ciclo de Marte
» Escritor/a:
   Millán Picouto

» Ed. Linteo Ediciones,
» Ano: 2007
» Xénero: Teatro
» CDU: 82-2=134.4
» IBIC: DD - Obras de teatro, textos teatrais
» Coleccion: Colección Aberta
» Pax: 344
» ISBN: 978-84-96067-31-8