9/30 Jano

Jano (A Coruña, 1979) é un autor perfeccionista, un dos máis destacados nomes da banda deseñada galega actual. Recibiu numerosos premios polo seu labor, entre os que destacan o do INJUVE e o Premio Ourense ao mellor autor non profesional. Incansable explorador da linguaxe e posibilidades artísticas da BD, experimenta coa ligazón con outras disciplinas artísticas e con técnicas fóra dos recursos habituais do cómic. Licenciado en Belas Artes pola facultade de Pontevedra, leva toda a vida facendo viñetas, tanto como autor completo ("Patricia", "Tapa roja") como exercendo de editor de fanzines notables ("Lixo", "Sintoteca"). Ten colaborado con innumerables publicacións ("Buen Provecho", "Tos", "BD Banda") e foi cofundador en 2001 do colectivo Polaqia. Na actualidade fai parte do elenco esencial do "Fanzine enfermo", candidato á mellor publicación amateur no Saló del Còmic de Barcelona.

Búmerang1. ¿Cales pensas que son as relacións que podemos establecer entre as disciplinas das artes plásticas e da banda deseñada?

Pois, moitas. Penso que son moi saudables as relacións entre distintos medios. En concreto, dentro da historieta pódese experimentar con distintos tipos de linguaxes pictóricas ou apropiarse de novas tecnoloxías como Internet. Isto dende un punto de vista máis formal. Pero tamén existe a posibilidade de apropiarse das narrativas do cine (Mark Kalesniko “Novia por Correo”) ou da escrita (Juanjo Sáez “Viviendo del Cuento”).

Búmerang2. ¿Cal é o debate que debe existir entre estes dous ámbitos? ¿Vías de saída?

Os historietistas non deben pecharse os ollos. É importante e casi diría que obrigado, conecer as diferentes correntes plásticas, estar aberto a experimentar con novas técnicas e tentar ser orixinais.

Mimetizar estilos, acomodarse graficamente e repetirse é malo para o enriquecimento artístico da historieta.

Búmerang3. ¿Cales serían as claves que definen o teu traballo?

Non cho sei.

Búmerang4. ¿Con que liña de traballos (artistas, tendencias,...) compartes concordancias ou te sintes identificado?

Gústanme moitos debuxantes diferentes. En liñas xerais, é xente que traballa por conta propia. Por poner algúns exemplos: Chester Brown, Blanquet, Jason, Kochalka, Mauro Entrialgo, Seth, Chris Ware, Paco Alcazar, Jeffrey Brown, Sara Vannon…


Búmerang5. Pensa nun proxecto que quixeras facer.

Que me paguen polo meu traballo.