É, ata a data, a artista galega máis importante no mercado dos EEUU e a asinatura autóctona por excelencia en Marvel Comics. Naquela mítica editorial participou no título colectivo Girl Comics e na popular serie Amazing Spiderman (nºs 631-633 con Chris Bachalo, nº 636 con varios debuxantes), ambos títulos de 2010, así como en Runaways, xa publicado en castelán por Panini en 2009, como segundo volume da cabeceira. Tamén debuxou para o selo Boom! en Irredeemable Special (2010) e The Art of Boom! Studios (2011). Ten traballado como arquitecta, ilustradora e autora de cómic, campo este no que se iniciou cun estilo próximo ao manga. Na súa etapa amateur colaborou entre outros cos fanzines El bolchevique vespertino, Esto es la guerra, Mensajes en una botella e Comikaze. É a guionista e debuxante da por agora inconclusa A prueba de balas, unha historia de acción futurista que comezou en formato fanzine (nº0, agosto de 2001; nº1, agosto de 2002) e que se iniciou como cómic por imprenta coa incorporación da autora ao colectivo Polaqia (A prueba de balas nº1, agosto de 2003). Unha historia curta deste universo publicouse no Fanzine das Xornadas (2002) e outra no Barsowia nº2 (2004). Colaborou noutros números do Fanzine en 2005 e do Barsowia en 2007 (nº9) e 2011 (nº16, facendo equipo con con Hwei Lin), así como no Dos Veces Breve Especial autoras (2006) e no Proxecto EntreCruzar (2006). Convidada a Angoulême en 2006 polo fanzine LŽinédit, que lle publicou un libro de bosquexos, e ao salón de Andenne (Bélxica, 2005 e 2006), así como a Viñetas desde o Atlántico (2009), onde contou con mostra monográfica propia. Fixo parte das seguintes exposicións: Novos autores coruñeses, Viñetas desde o Atlántico 2000; O chapapote móvese, 2003; Polaqia en llamas, Viñetas desde o Atlántico 2006; La historieta gallega, Fundación Feima, Madrid 2006; O Medo, salón do libro infantil de Pontevedra, 2007.

Palmarés
Gañou o concurso de Arteixo en 1999 co cómic Como el cielo en invierno. Terceiro premio do Certame de Banda Deseñada da Xunta de Galicia (2004) formando equipo con David Rubín. Premio ao mellor autor revelación en Expocomic (Madrid, 2008) por Los Reyes Elfos: Historias de Faerie 2 e Barsowia.

Formación específica
É arquitecta pola Universidade da Coruña.

---

---

---

  Noticias relacionadas