Chegan ao mercado novos xogos de mesa en galego de cara ao Nadal

A se achegar as festas de Nadal, multiplícanse as presentacións de xogos na nosa lingua e vencellados á nosa historia. Neste 2023 súmanse á oferta dispoñible neste campo Sálvora de Brazolinda Xogo, Galiza no tempo de OzocoGZ e mais Invisibilizadas, co que a cooperativa Atalaias convida a coñecer mulleres destacadas da historia.

Sálvora, o último lanzamento de Brazolinda xogos, parte do suceso histórico do naufraxio do vapor Santa Isabel nesta illa en 1921. O obxectivo das persoas participantes é salvar o máximo de superviventes desta catástrofe nun lanzamento que aposta polo xogo cooperativo de estratexia e que quere pór en valor "a importancia do esforzo e a colaboración en momentos complicados".

Pola súa banda, OzocoGZ acaba de presentar Galiza no tempo. Este xogo convida a coñecer a historia do país mediante unha baralla de cartas que representan acontecementos destacados do noso pasado. Cada participante debe colocar na orde cronolóxica correcta as cartas que ten na man para ser o primeiro en quedar sen elas.

Cunha mecánica similar a cooperativa Atalaias presentou o proxecto Invisibilizadas. Este proxecto, segundo da súa serie Feminismos no tempo convida a situar na orde cronolóxica correcta unha serie de mulleres destacadas na historia.

Tamén está dispoñible para estas datas Cordadas, un xogo tamén de cartas editado por Muki Xogos en edición bilingüe en galego e castelán no que cada intervinte deberá loitar por chegar primeiro a un cumio a empregar todo tipo de trucos contra os seus rivais.