Galaxia presenta dúas obras inéditas de Del Riego

A editorial lanzou ademais a biografía e dúas reedicións do homenaxeado no Día das Letras

Capa da biografía de Fernández Del Riego
Capa da biografía de Fernández Del Riego
Continúan os anunciados lanzamentos editoriais arredor da figura de Francisco Fernández del Riego, homenaxeado no Día das Letras Galegas deste ano. Entre estes destacan dúas obras inéditas do autor, o seu Diario da guerra e mais as Memorias do París literario. Canda a elas, a editorial Galaxia presentou dúas reedicións Camiño andado e A xeración Galaxia e está a dar a coñecer a biografía que escribíu Malores Villanueva sobre el.

Deste xeito, o Diario da guerra, que ve a luz con limiar do historiador Lorenzo Fernández Prieto, repasa as vivencias de Del Riego como artilleiro dunha batería antiaérea, acompañadas de diferentes fotografías da época e mapas que permiten seguir o percorrido do autor durante o conflito. Pola súa banda, en Memorias do París literario, Del Riego narra a súa viaxe á capital francesa en 1953, o reencontro co pintor Manuel Colmeiro e con outros persoeiros, entre eles moitos exiliados, e as súas impresión sobre a vida cultural francesa do momento.

Canda a estes, a editora acaba de lanzar a reedición das memorias Camiño andado, nas que o homenaxeado percorre a súa vida "desde o agromar da República e o pulo do galeguismo ata o labor cultural para reconstruír na clandestinidade" o movemento galeguista e achega da democracia. Na mesma liña, a recupera tamén A xeración Galaxia, na que o autor explica a "aventura cultural e política protagonizada por un feixe de homes e mulleres que nos anos máis escuros do franquismo" para desenvolver mediante diferentes proxectos o galeguismo cultural que marcou o país durante décadas.

Finalmente, Malores Villanueva está a presentar por todo o país Francisco Fernández del Riego. Un loitador pola idea de Galicia. Esta biografía, que a autora elaborou a partir de horas de conversas co homenaxeado, percorre a súa vida e obra a repasar as múltiples facetas de quen se definía como "un optimista radical" que, segundo apunta a autora "queimou a vida na construción dunha Galicia dona de seu".