.jpg)
Cuentos Gallegos por O Xestal. 1961. Primeiro disco do humorista. Fonte: Xohán Xabier Baldomir Cabanas
O Concello de Carballo celebrará no ano 2023 o 90º aniversario do nacemento e o 30º do pasamento de Carlos Díaz Gestal, O Xestal buscando recuperar e poñer en valor a figura do humorista e músico, que aínda que nacido na Coruña residiu no lugar do Seixo (Lema) durante máis de vinte anos ata o seu falecemento. O Xestal foi un personaxe que acadou fama e popularidade na súa época a través de gravacións humorísticas distribuídas en discos e cassettes con éxito de vendas e cuxa obra é hoxe imposible de encontrar fora de centros de documentación como o Arquivo Sonoro de Galicia. O Xestal empregou o humor como un xeito de activismo e reivindicou a nosa cultura, conseguindo un grande éxito. Pola súa faceta musical a el se lle debe a popularización de pezas como a Marcha do Antigo Reino de Galicia, a Foliada de Montemaior ou a celebérrima Apaga o candil que durante moitos anos fechou o programa Luar, entre moitas outras pezas que el mesmo recollía e gravaba. Ademais foi impulsor de formacións corais e participou de agrupacións tradicionais. O filólogo Xohán Xabier Baldomir Cabanas publicou en 2013, da man da Editorial Académica Española, o libro 'O Xestal. Contador de contos', no que se achegou ao traballo deste humorista mediante a análise de 83 dos seus relatos.
Non é a primeira vez que desde o Concello de Carballo se rende homenaxe a esta singular figura, xa no ano 2010 se levaran a cabo accións neste sentido, pero agora o goberno municipal (BNG) levará a pleno o vindeiro martes esta proposta que se materializará coa declaración do ano que vén como "Ano do Xestal". A proposta inclúe, ademais a realización das xestións precisas para o traslado dos seus restos mortais dende o cemiterio parroquial de San Martiño de Razo, onde foi soterrado nun nicho cedido provisionalmente, ao cemiterio municipal de Carballo; a creación dunha comisión organizadora dos actos conmemorativos do "Ano do Xestal", presidida polo alcalde ou persoa en quen delegue e formada por persoal de distintas áreas municipais e representantes de entidades e/ou medios de comunicación aos que estivo ligado Carlos Díaz Gestal durante a súa estadía en Carballo, e o traslado deste acordo aos concellos nos que residiu ao longo da súa vida, así como á Xunta de Galicia e á Deputación Provincial da Coruña, para que consideren sumarse á conmemoración do "Ano do Xestal".
.jpg)
