Localizan un novo castro en Barreiros

O concello lugués de Barreiros dispón dun novo castro no lugar de A Maradona, na parroquia de Cabarcos. O xacemento arqueolóxico foi descuberto polas asociacións Mariña Patrimonio e Irmandade Santo Estevo tras unha corta de eucaliptos. O castro ten uns 110 metros de longo por 50 de ancho e está situado nun esporón rochoso entre dous ríos. Preto do itsmo que conecta o sitio co exterior, pode apreciarse unha edificación parcialmente desenterrada cunha cabeceira semicircular. Segundo as devanditas asociacións, podería tratarse dun monumento con forno ou sauna, un dos tipos de edificios máis característicos da Idade do Ferro no noroeste peninsular. Un técnico da Dirección Xeral de Patrimonio desprazouse ata o lugar e catalogou o castro. Segundo as asociacións, tamén "sinalou que a edificación que aparece no xacemento, pola súa morfoloxía e ubicación, podería tratarse dunha sauna", pendente dunha intervención arqueolóxica que o confirmara. De ser así, sería a sétima localizada en Galicia ata o momento.