Jesús Mosquera, de Jega Comunicación Visual e mais Raquel Seijas, de Escenoset, protagonizan a XI entrega dos Diálogos Confinados do Consello da Cultura Galega. A institución ten xa no seu web o vídeo do novo debate, moderado por Rosario Sarmiento, no que se aborda a problemática da montaxe e a produción de exposicións no contexto da crise sanitaria actual. Segundo explican as persoas convidadas, o sector aproveitou o confinamento para apostar por unha diversificación de actividades e afondar no ámbito dixital. Para alén das cancelacións destes meses, as medidas de seguridade e distancia actual están a dar nunha maior aposta por exposicións no exterior e nun incremento do peso do virtual no traballo neste campo.
Como iniciativas necesarias para apoiar este ámbito cultural, no diálogo reclámanse medidas como "unha maior formación nas escolas para a valoración dos bens culturais do público do futuro; o establecemento de medidas de protección non só das persoas usuarias senón tamén dos prestatarios dos servizos; a reactivación da contratación de calidade e inxección económica por parte do sector público; a eliminación de trabas administrativas; a apertura de novas liñas de traballo e o reforzo do ámbito dixital son algunhas das claves que se deberían abordar a curto e medio prazo para un sector coa ollada posta na reactivación do traballo xa de cara ao último trimestre deste ano", segundo recolle o web do Consello da Cultura.
