"La traslación de los restos de Santiago a la sede de Padrón" de Raimundo de Madrazo Foto: Catedral de Santiago
O Museo da catedral de Santiago expón desde hoxe a súa recente adquisición, o cadro La traslación de los restos de Santiago a la sede de Padrón de Raimundo de Madrazo (Roma, 1841 – Versalles, 1920). A peza, de grandes dimensións, foi realizada en 1859 cando o artista contaba só dezaseis anos e está considerada obra mestra da pintura española do século XIX, relacionada, por temática, co ámbito xacobeo o que provocou o interese da Fundación Catedral de Santiago. O cadro foi adquirido en poxa na casa madrileña Fernando Durán, e segundo a súa historia desde 1906 era propiedade dun coleccionista particular, polo cal non foi ata o de agora que pode ser contemplado en exhibición pública. A súa chegada ao Museo foi posible grazas á participación da Obra Social "la Caixa" quen colabora coa Catedral. O Museo catedralicio é visitado anualmente por más de 200.000 persoas e conserva unha das coleccións artísticas máis importantes de Galicia. Con esta e outras obras a Fundación cumpre coa súa finalidade social de conservar, investigar, difundir e acrecentar os fondos relacionados coa historia da catedral compostelá e co fenómeno xacobeo.
