Ana Varela Miño gaña o VI Premio de Poesía Gonzalo López Abente

O xurado do Premio de Poesía Gonzalo López Abente daba a coñecer onte o resultado da sexta xeira deste galardón. O poemario Onde nacen as hedras, que presentou Ana Varela Miño baixo o lema Pitia impúxose por unanimidade no certame. Segundo destacou o xurado, composto por Noelia Gómez Calvo, Xulio Cid Neira e Xesús M. Sambade Soneira, Secretario da Fundación Gonzalo López Abente con voz e voto, na obra "atopamos coherencia e cohesión en todo o percorrido poético, desde o título, as citas introdutorias de Anne Carson e Louise Grück, ata o propio corpo do texto". Segundo detalla o fallo do xurado "trátase dun poemario que dá sinais, prevé o baleiro, abre as fendas do que xa non é, ata chegar a a habitar o oco, ese lugar onde nacen as hedras. Neste tránsito, a escrita actúa como o oráculo que todo o ve, que todo o cose, incluso a ruína". A autora recibirá un galardón de 2.000 euros en metálico e verá o seu poemario publicado por Xerais.