Beatriz Maceda Abeleira gaña o II Premio María Victoria Moreno

A autora recibirá 4.000 euros e verá a súa obra publicada por Urco Editora

Beatriz Maceda. Fotografía de Eduardo Castro Bal para o Centro de Documentación da AELG
Beatriz Maceda. Fotografía de Eduardo Castro Bal para o Centro de Documentación da AELG
O Concello de Pontevedra e Urco Editora facían público onte o fallo do II Premio María Victoria Moreno de Literatura Xuvenil que organizan as dúas entidades. O xurado seleccionou entre as 17 obras presentadas ao certame Ardora, de Beatriz Maceda Abeleira a atender ao seu "compromiso co ecoloxismo e coas novas formas de convivencia, a construción duns personaxes secundarios de gran relevancia, o emprego responsábel das novas tecnoloxías" así como "a empatía co seu público potencial: o lectorado que está nos primeiros anos da adolescencia". A autora recibirá un premio en metálico de 4.000 euros e verá a súa obra publicada por Urco.

O xurado estivo composto por Eli Ríos en representación da familia de María Victoria Moreno, Antonio Sambade Caamaño, alumno do IES Torrente Ballester, Anxos Rial en representación do Concello de Pontevedra, Antonio Manuel Fraga, gañador da edición anterior, Andrea Jamardo Seijo en representación de Urco Editora e David Cortizo Conde, de Urco Editora, que actuou como secretario. A maioría das obras que se presentaron ao certame eran de narrativa cunha grande presenza de xénero fantástico. A diferenza da anterior xeira non houbo propostas de poesía ou teatro.