O papel de referencia da capital galega no eido da arte gráfica da ilustración tamén se viu reflectido esta semana co acto de entrega do XI Premio Internacional Compostela de Álbums Ilustrados, convocado pola Concellaría de Educación e Cidadanía en colaboración coa editorial Kalandraka. O alcalde, Martiño Noriega, entregou o galardón a Fran Pintadera e Christian Inaraja, escritor e ilustrador de Cándido y los demás. Da obra gañadora, o xurado destacou "o seu estilo actual, directo e coherente; e a súa riqueza gráfica". En canto á súa temática, a obra de Fran Pintadera e Christian Inaraja "fala de que todos e todas somos diferentes, da mirada dun mesmo cara os demais, e dos demais cara un mesmo". O Premio Internacional Compostela para Álbums Ilustrados vénse organizando dende o ano 2001, co obxectivo de fomentar este xénero literario e artístico e proxectar internacionalmente o nome da cidade. É, ademais, un dos concursos internacionais con maior dotación económica no seu ámbito de especialización, con 9.000 euros en concepto de adianto polos dereitos de autor. A editorial Kalandraka publica a obra gañadora nas cinco linguas oficiais da península (galego, castelán, catalán, éuscaro e portugués), así como en inglés.