Galería: Fitos da BD dos 70

A evolución da banda deseñada galega nos anos 70 amosou unha grande variedade de manifestacións artísticas e temáticas. Xulio Carballo selecciona para nós unha serie imaxes que funcionan como fitos para nos achegar a este panorama.

O emigrante

Para a súa primeira historieta, O emigrante, Xaquín Marín daría a coñecer o que sería o leit motiv de boa parte das súas obras: a denuncia do dramático ciclo de emigración que sofren os galegos.

O home que falaba vegliota

Reimundo Patiño crea en O home que fala vegliota un desconcertante mundo distópico onde todo está controlado e manipulado, deixando observar as fortes influencias da ficcióncientífica como o Farenheit 451 de Ray Bradbury -adaptada ao cine por François Truffaut- ou as obras de Aldous Huxley e George Orwell.ñññññ

A pomba da libertade

A pomba da libertade de Xosé Díaz sería exposta ao longo de todo o país xunto coas obras resto de autores do Grupo do Cómic do Castro así como con Xaquín Marín, Reimundo Patiño, Ricardo Lázaro e Pepe Barro. A BDG consolidaríase por medio destas pranchas e exposicións como un eficaz altofalante político.

Tira de Fuco

Aínda que Xaquín Marín ou Xosé Lois serían os máis prolíficos e recoñecíbeis, durante toda a década publicaríanse numerosas tiras de autores xa case esquecidos, e que, porén realizaron acedas proclamas desde os seus cadriños, neste caso na tira de Fuco, de Vicente Veiga.

Prancha de Comandante Iago

Nas páxinas do semanario infantil Axóuxere, autores como Ulises Sarry profundaron na temática da ficción científica onde filmes de culto como 2001: a Space odyssey estaban moi presentes na concepción gráfica.

Historia da Reconquista de Vigo

Nos anos 70 publicaríase tamén un dos primeiros álbumes de BDG histórica que contaría con apoio das institucións, un feito que se tornaría común a partir dos anos 80.

Prancha de Carta do pai

A produción de BD nestes anos abranguería diversos formatos e técnicas, como este linóleo de Pepe Barro que reproduce o conto Carta do pai de Darío Xohán Cabana.