Capturas de pantalla da app
A plataforma social patrimoniogalego.net, unha ferramenta colaborativa de catalogación do patrimonio cultural, publicou hoxe una aplicación web destinada á "exploración das paisaxes culturais de Galicia". Trátase dunha web optimizada para teléfonos móbiles que permite visualizar sobre o territorio os bens culturais subidos á plataforma polos usuarios que participan no proxecto, e que suman ao redor de 14.000 recursos que van desde sitios arqueolóxicos ata etnográficos. Para "engadir contexto", a app sumou o Inventario do Patrimonio Cultural de Galicia, da Xunta, e a capa de microtoponimia procedente do proxecto Galicia nomeada, da Real Academia Galega e tamén a Xunta de Galicia. En total, o usuario ten acceso a 620.000 recursos de patrimonio material e inmaterial. O proxecto compleméntase con diferentes ferramentas para que o usuario poida visualizar o patrimonio na súa contorna, como un modo de realidade aumentada ou ferramentas de intelixencia artificial para interpretar a paisaxe da contorna. O acceso á app é gratuíto.
