Observación: A balanza comercial da cultura

Malia a que as contías non chegan ás de sectores coma a automoción ou o turismo, Galicia tamén conta con exportacións e importacións de carácter cultural. Obras de arte, libros, produtos audiovisual e outras obras entran e saen do noso país. En 2007 as vendas ao exterior supuxeron máis de nove millóns de euros, mentres a importacións ascenderon a once millóns e medio. O Observatorio da Cultura do Consello da Cultura Galega achéganos unha primeira aproximación a esta balanza comercial da nosa cultura.

Os datos do Observatorio de Cultura proveñen dunha análise do informe Comercio exterior e intracomunitario do Instituto Galego de Estatística. En concreto, contempláronse "os epígrafes sobre produtos editoriais, cinematográficos, obras de arte e mais instrumentos e música", explica Håkan Casares desde o Observatorio. "Existen outros nos que se inclúen produtos culturais, pero non é posible diferencialos doutros".


A evolución da balanza


Entre 2000 e 2007 Galicia obtivo un saldo comercial positivo das súas importacións e exportacións de bens culturais unciamente nos anos 2002 e 2006. No resto do período contemplado, importáronse máis bens dos que se venderon ao exterior. Os produtos editoriais están á cabeza das nosas exportacións (7.870.000 euros en 2007) seguidos polo audiovisual (1.638.000 euros nese mesmo ano). De feito, son os produtos editoriais os que provocan o movemento ascendente da balanza en 2002 e 2006, que foron anos extraordinarios neste campo: Os máis de doce millóns de euros de exportación editorial de 2002 triplican os do ano anterior e os dez millóns de 2006 son o doble do que se movera en 2005. No resto dos epígrafes a variación neste período e escasa, cunha tendencia á alza na exportación de produtos artísticos.

Comercio exterior e intracomunitario segundo seccións e capítulos TARIC
	Galicia / Miles de euros
	Exportacións/Expedicións
	2002	2003	2004	2005	2006	2007
Produtos fotográficos ou cinematográficos	1735	1450,3	863	1077,8	951,1	1638,2
Produtos editoriais, da prensa ou doutras industrias gráficas; textos manuscritos ou mecanografados e planos	12037,7	6847,6	5052,9	5094,4	10352,7	7870,2
Instrumentos de música; partes e accesorios destes instrumentos	66,9	12,2	3,2	160,9	73,3	39
Obxectos de arte, de colección ou de antigüidade	20,6	59,1	56,6	77,3	48,4	187,9
Total	13860,2	8369,2	5975,7	6410,4	11425,5	9735,3
	Importacións/Introducións
	2002	2003	2004	2005	2006	2007
Produtos fotográficos ou cinematográficos	4125,4	2056	2243,4	1978,7	1770	2436,2
Produtos editoriais, da prensa ou doutras industrias gráficas; textos manuscritos ou mecanografados e planos	4546,5	5835,4	6160,6	5086,9	5180,4	5102,4
Instrumentos de música; partes e accesorios destes instrumentos	109,1	167,4	206,2	255,5	398,2	505,7
Obxectos de arte, de colección ou de antigüidade	333,2	4431,8	635,5	708,5	1623,2	3493,9
Total	9114,2	12490,6	9245,7	8029,6	8971,8	11538,2
Explotación específica do Observatorio da Cultura Galega a partir da elaboración IGE a partir dos ficheiros proporcionados pola Agencia Estatal de Administración Tributaria
Os datos do ano 2007 son provisionais. I.G.E. - Instituto Galego de Estatística

A distribución territorial



Por provincias, obsérvase un abrumador predominio das franxa atlántica neste campo. "A concentración de exportación na Coruña e Pontevedra relaciónase cunha maior presenza de empresas, especialmente editoriais", explica Casares. Nese sentido resulta curioso comprobar que A Coruña é a única provincia cunha balanza comercial positiva no último ano.


Os mercados



América Latina é, cando menos nos últimos anos, a área na que obtemos uns mellores resultados comerciais no último ano que se contempla na serie. Foron para alá bens por un total de 974.000 euros e viñeron 194.700. Pola contra, Europa é o noso principal fornecedor de produtos deste tipo. Estados Unidos e, de xeito curioso, China, aparecen tamén coma axentes destacados nese intercambio cultural e comercial.