O proxecto As pegadas do baile facilita a aprendizaxe de coreografías tradicionais

Un lenzo no chan con pegadas numeradas a indicar os movementos dos diferentes bailes tradicionais galegos. Co nome de As pegadas do baile, esta é a nova proposta de Artur Puga para facilitar o ensino deste patrimonio inmaterial. O vindeiro día 30 de novembro, o Culturgal acolle a presentación deste proxecto no marco do encontro Ven e baila, dedicado a este legado.

Segundo explicaba Puga na presentación da feira, o proxecto pretende levarse por concellos, centros educativos e outros espazos nos que se poidan instalar estes esquemas. As Tanxugueiras preséntanse como embaixadoras deste proxecto que, está dispoñible para todo o público que asista ao Culturagal durante toda a duración do evento. A proposta de Puga súmase a múltiples iniciativas que apostan nos últimos anos por novas canles para difundir o baile tradicional.