A protección de dous mosteiros afectaralle á construción de encoros na Ribeira Sacra

A central hidroeléctrica que Iberdrola proxecta en Parada do Sil pode verse afectada pola declaración coma Ben de Interes Cultural do Mosteiro de Santa Cristina de Ribas de Sil. Segundo publica hoxe La Voz de Galicia o polémico encoro atópase nun terreo que fai parte do perímetro de protección deste ben, que se publicou o pasado luns no Diario Oficial de Galicia. Segundo explica este xornal, as obras non se poderán iniciar mentres non se resolva a proposta de declaración coma Ben de Interese Cultural, e unha vez rematado este expediente, precisarán contar co visto bo de Patrimonio. Nese sentido, desde a Dirección Xeral confirman que se as obras do encoro afectan a este perímetro, terían que se informadas e autorizadas, mesmo se só provocan alteracións no nivel das augas.

Ao tempo, a Consellaría de Cultura lembra que o Consello da Xunta aprobará mañá o decreto que fixa o perímetro de protección de Santo Estevo de Ribas de Miño, outro mosteiro declarado Ben de Interese Cultural. Este perímetro, que se estende polas dúas bandas do río, afectará tamén a outros elementos patrimoniais coma o Castro de San Fiz, o Pazo das Fraguas, a Adega do Santo dou dúas capelas. O perímetro chega ao pé da central de Belesar, o que podería influír, ao igual que no caso de Santa Cristina, ao proxecto Belesar III, xa amplamente contestado por diferentes colectivos ecoloxistas.

Segundo denunciara a Asociación para a Defensa Ecolóxica de Galiza, este proxecto hidroeléctrico pretende bombear auga desde o encoro dos Peares, augas abaixo, ata o de Belesar e prevé o movemento de grandes cantidades de terra, o que podería afectar a este contorno de protección. Segundo ADEGA, aínda non se fixeron públicos os planos que determinan con exactitude as áreas ás que afectan as obras.