O Ciclo Poetas Di(n)versos comeza hoxe con Marga Tojo e a ucraína Halyna Kruk

A 17ª edición do Ciclo de poesía Poetas Di(n)versos da Coruña dará comezo hoxe no auditorio do Centro Ágora cun primeiro recital que reunirá á poeta santiaguesa Marga Tojo coa ucraína Halyna Kruk (Lviv). Comezará con elas un trimestre no que esta cita dirixida pola poeta e xestora cultural Yolanda Castaño. Premio Nacional de Poesía 2023, incluirá tres encontros que contarán con algunhas das autoras máis recoñecidas da poesía ucraína, india e arxentina, acompañadas por destacadas poetas en lingua galega. Os días 6 de outubro, 17 de novembro e 8 de decembro serán as datas escollidas para o trimestre outonal. Todas a lecturas ofrecerán folletos coleccionables coas biografías e poemas das persoas convidadas e emitiranse igualmente por streaming. O 17 de novembro acollerá unha sesión moi especial: dúas mozas indias poetizan o mundo e as súas inxustizas sociais nunha lingua minorizada; a primeira no seu materno canarés e a segunda na de acollida: o galego. Elas son Reshma Ramesh e Yamini Teresa Prabhu Barretto. Finalmente, o luns 8 de decembro Maria Negroni e Noelia Gómez demostrarannos que o don para poetizar a sombra é quen de transformar a dor en beleza transcendente, xa cheguen da Arxentina ou de Rianxo.

Este primeiro recital reunirá dúas voces que escriben as tensións entre o íntimo e o compartido sabendo que o corpo pode ser tanto vínculo como conflito. A ucraína Halyna Kruk (Lviv, 1974) unha premiada poeta, narradora, tradutora e investigadora que, desde o seu debut en 1997, publicou sete libros de poesía, un volume de relatos e catro libros para público infantil. Foi recoñecida con numerosos galardóns dentro e fóra da Ucraína, entre eles o nomeamento como finalista do Premio de Poesía Griffin 2024 e do PEN America 2025, así como o Premio Sundara Ramaswamy, o Women in Art Prize 2023, o premio da Fundación Kovaliv 2022 e o premio ao mellor libro do BookForum 2021, entre outros. Por outra banda, a escritora e xornalista compostelá Marga Tojo cultiva a poesía, o ensaio e, máis recentemente, tamén a narrativa. Como xornalista colaborou en medios como Nós Diario, Galicia Hoxe, Público, Altermundo, Revista Luzes ou Praza. A súa produción literaria comeza coa poesía, marcada pola consciencia de clase e de xénero e pola súa linguaxe espida e directa. 'Últimos bruídos' (2016) foi un dos seus primeiros poemarios: unha ollada sobre o común, a política social e a conciencia crítica. Con 'Cara de velocidade' (2018) –poemario premiado co Premio Internacional Cidade de Orihuela para nenos e nenas– achegou os seus versos ao público infantil e familiar. En 2021 publicou 'Arder', poemario no que reaparece a forza crítica e lírica sobre temas como o corpo, o territorio, o social e as tensións entre o persoal e o político.