Sociedade, economía e territorio centran o segundo Foro Grial

Hoxe xoves, a partir das 16:00 horas, a sede do Consello da Cultura Galega, en Santiago de Compostela, acollerá unha nova edición dos Foros Grial, baixo o título "Galicia 2050. Pensar cara adiante. Sociedade, economía e territorio". Este evento lévase a cabo no marco da celebración do 75 aniversario de Editorial Galaxia, como un ciclo de catro encontros que comezaron no mes de novembro de 2024 e que se celebrarán ata outubro de 2025. A xornada de hoxe propón un debate colectivo arredor dos desafíos que enfrontará o país nas vindeiras décadas, está coordinada por Ramón Villares e Xoaquín Fernández Leiceaga, e abrirase cun acto de presentación no que intervirá Rosario Álvarez Blanco, presidenta do Consello da Cultura Galega, Valentín García Gómez, secretario xeral da Lingua da Xunta de Galicia, Xosé Manuel Soutullo, director de Editorial Galaxia, Henrique Monteagudo, director da revista Grial, e Ramón Villares, en calidade de coordinador. As xornadas retransmitiranse en liña e pecharanse coas conclusións a cargo de Xoaquín Fernández Leiceaga, ofrecendo unha síntese das ideas abordadas e sinalando camiños posibles para a Galicia que está por vir.

O programa de hoxe desenvolverase a través de catro relatorios principais. No primeiro deles Ramón Villares afondará en como pensar historicamente o futuro de Galicia, tomando como referencia estudos realizados nas décadas pasadas e interrogándose sobre o papel da nosa sociedade nos próximos 25 anos. Tras del Antía Pérez Caramés ofrecerá unha análise prospectiva da demografía galega, examinando os cambios máis recentes e os retos futuros en termos de estrutura de idade, avellentamento e fluxos migratorios. Pola súa banda Xoaquín Fernández Leiceaga e Edelmiro López Iglesias exporán unha visión conxunta sobre "as perspectivas económicas dos nosos netos", como reza o título do seu bloque, avaliando os escenarios de crecemento, ocupación, produtividade e cohesión territorial. Finalizará o programa coa intervención de Luciano G. Alfaya. Preguntarase que facer co territorio, cunha reflexión sobre os modelos de ordenación e as ferramentas urbanísticas necesarias para afrontar o futuro con garantías.

Vindeiros encontros
Este encontro forma parte da serie de catro foros temáticos co obxectivo de ofrecer ideas e propostas, adiantando tendencias de futuro nunha serie de ámbitos chave da sociedade e a cultura. Os vindeiros Foros celebraranse na Coruña, en xuño, coordinado por Marilar Aleixandre e Sonia Villapol, baixo o título "Impacto social da ciencia e dos avances tecnolóxicos", e en outubro, en Vigo, coordinado por Víctor F. Freixanes e Llerena Perozo Porteiro, baixo o título de "Comunicación. Desafíos para os novos tempos".