Imaxe do vídeo O Castro de Trelle: historia, tradición e futuro
Co título O Castro de Trelle: historia, tradición e futuro, a asociación Amigos do Patrimonio de Toén acaba de subir ás redes un documental sobre este conxunto patrimonial. A filmación repasa, ao longo de 24 minutos, a historia, os achados e as interpretacións que en diferentes épocas se foron realizando encol do castro.
Canda a isto, a produción dá conta das investigacións e descubertas que se realizaron no conxunto na primeira campaña de escavación arqueolóxica que promoveu a entidade. No vídeo, profesionais do equipo de Árbore Arqueoloxía explican os seus métodos de traballo, achados e teorías sobre diferentes parte deste monumento, a sinalar cuestións como que ata hai poucas décadas as murallas do monumento ficaban á vista, e que boa parte da degradación do mesmo se debe á plantación de árbores no recinto.
Amigos do Patrimonio de Toén, nada en 2019, desenvolve un proxecto de "catalogación, posta en valor, sinalización e divulgación do rico patrimonio material e inmaterial que teñen estas terras, así coma un estudo e publicación da historia" da zona. Para esta campaña arqueolóxica contou con fondos Fondos Feader (Fondo Europeo Agrícola de Desenvolvemento Rural) da Unión Europea e coa colaboración da Comunidade de Montes de Man Comun Moreiras-Trelle da Asociación Porta da Cadea.
