Os Bicos de cine de Manuel Moldes expóñense en Pontevedra

Desde este 3 de decembro, a sede da Fundación Manuel Moldes expón a serie de debuxos Bicos de cine, que o pintor realizou o pintor para as Xornadas de Cine e Vídeo do Carballiño (Xociviga) de 1991. A colección de 25 obras, custodiada na Filmoteca de Galicia, amosa a afección polo cinema do artista e só se puidera ver anteriormente en tres ocasións.

Alén das propia Xociviga, a mostra estivo presente na Coruña en 1992 e en Madrid en 2007. As ilustracións retratan bicos icónicos do cinema universal, pero recollen tamén homenaxes como a que realiza ao filme Miss Ledyia, primeira película de ficción rodada en Galicia.

Xosé Enrique Acuña e Ramón Rozas Domínguez actuaron como comisarios deste proxecto , que se pode visitar ata o vindeiro 28 de marzo os xoves e venres de 18 a 21 horas e sábados entre 12 e 14 e de 18 a 21 horas.