A colección da Fundación Vicente Risco intégrase no Sistema Galego de Museos

O legado dunha das figuras centrais da Xeración Nós, Vicente Risco, conta desde agora cun maior grao de protección e recoñecemento institucional. O Consello da Xunta aprobou a integración da Colección Vicente Risco no Sistema Galego de Museos. A decisión, tomada na reunión do goberno galego deste luns 1 de decembro, implica a creación e cualificación oficial destes fondos como Colección Museográfica. A titularidade e xestión continuará a cargo da Fundación Vicente Risco, que custodia este patrimonio na súa sede de Allariz.A colección agora integrada constitúe un testemuño fundamental para comprender a poliédrica figura do intelectual galeguista. Os fondos organízanse cronoloxicamente para amosar as súas diversas facetas como pensador, escritor, teórico da arte e etnógrafo. O arquivo inclúe un vasto patrimonio que abarca a súa biblioteca persoal, documentación biográfica e correspondencia, así como unha destacada sección de obra plástica con debuxos do propio autor e material etnográfico recollido durante as súas investigacións.