Ourense acolle ata o xover as xornadas "Galicia oitenta anos despois" que analizarán a obra e o pensamento de Risco contrapoñéndoos coa situación actual do país. A Fundación Vicente Risco pretende rendir así unha homenaxe ó polígrafo e pensador galego que lle dá nome.
Risco e a actualidade
Durante a primeira xornada do congreso, que se celebrarán no Centro Cultural Simeón da Cidade das Burgas, realizarase un achegamento á vida e a obra de Vicente Risco, a cargo do catedrático de Historia Contemporánea Jesús de Juana. Tamén hoxe o escritor e xornalista Arturo Lezcano falará da vixencia do grupo Nós e, ás nove e media da noite presentarase a edición crítica da obra de Risco "Teoría do nacionalismo galego".
Galicia hoxe
A xornada de mañá centrarase na análise da situación de Galicia en diversos campos. Xosé M. Rivera Otero, profesor de Ciencia Política na Universidade de Compostela explicará a súa visión sobre a situación e perspectivas dos partidos políticos en Galicia, e o historiador Xusto Beramendi falará sobre o autogoberno galego entre España e a Unión Europea.
Roteiro e premio literario
Dentro dos actos das xornadas está prevista a realización dun roteiro cultural por lugares destacados da cidade de Ourense na vida de Risco, como a sé da Revista Nós. Por outra banda, a Fundación Organizadora ven de convocar a segunda edición do Premio Risco de Literatura Fantástica, dotado cun millón de pesetas.
