Carme López fai unha homenaxe contemporánea ás informantes da música de tradición oral

Carmela é o nome do proxecto centrado na música de tradición oral da artista Carme López, baixo o que ven de presentar o disco 'Vinde todas'. Carme, intérprete e docente na ETRAD de Vigo, recibiu neste 2024 o Premio Martín Codax de Música Contemporánea grazas ao seu proxecto 'Quintela' , a primeira obra de música experimental para gaita. En 'Vinde todas' e como Carmela, asenta este proxecto sobre dous piares fundamentais, a perspectiva de xénero e a investigación etnográfica, os cales toman como eixo principal as informantes, aquelas mulleres que achegan músicas e informacións arredor da tradición oral. Cada unha das cancións leva o nome da ou das mulleres de referencia, algunhas xa desaparecidas, no proceso de aprendizaxe das melodías, ademais de iniciar e pechar o disco cadansúa gravación de campo, as que reflicten o propio proceso de investigación etnomusicolóxica. O disco traza unha liña entre o seu primeiro tema e o último que vai das cantareiras informantes xa desaparecidas de Moscoso ás Pandereteiras de Toutón, mantedoras da tradición.



Esa visibilización das informantes tráenos os nomes de mulleres como Rosa e Aida, Lina e Lola, Corona, Hermosinda, Julia, Nicanora, Severina e Regina. Todas elas imprescindibles para a transmisión interxeneracional desta tradición. Os usos e funcións da música ou as técnicas interpretativas das propias informantes están presentes na conformación dos temas para a súa gravación, cunha intención declarada de ir máis alá da creación estética. A través dos 10 temas que propón este 'Vinde todas' transitamos por xéneros diversos dentro destes cantares, que van máis lá daquelas propostas bailables para amosar outras de diferentes intencións. Os arranxos do disco, na liña experimental de López, mesturan ás propias da tradición con outras vinculadas coas tendencias o recursos máis actuais, as veces acústicos e en moitos casos electrónicos, sinalando outro dos conceptos esenciais para ela: a adaptabilidade e flexibilidade da tradición. Tamén se inclúen sons ambiente e da propia natureza, os propios das recollidas de campo. Para a produción e gravación Carme Lopez contou coa colaboración de Arturo Vaquero, nos Estudios Abrigueiro de Friol. A nivel musical contou tamén coa colaboración das Pandereteiras de Toutón nalgúns do temas.