O 29 Festival Galicreques achega 60 funcións da man dunha trintena de compañías

Entre os días 12 e 20 de outubro Santiago de Compostela acolle a vixésima novena edición do Festival Galicreques. O encontro de títeres conta nesta xeira cun total de 60 funcións a cargo de 30 compañías de 8 países, cunha especial presenza de Portugal e unha xornada dedicada ao aniversario da revolución do 25 de abril. A organización do encontro outorgoulle nesta xeira o seu premio de honra a Eduardo Rodríguez Cunha Tatán, "figura imprescindible da escena galega en xeral e do teatro de monicreques en particular".

A organización do festival quere con este galardón reivindicar "a traxectoria, o esforzo e o talento dun dos grandes nomes das nosas artes escénicas. Sen o seu traballo como actor e como titiriteiro, o noso teatro non sería o que é hoxe por hoxe", explica. "Tatán forma parta da xeración de pioneiros que abriu camiños para a dignificación da escena dos monicreques. O seu labor en Tanxarina, unha das compañías máis importantes do país, é exemplo para todas as xeracións, para calquera artista e para o futuro deste oficio das marionetas". A entrega do premio realizarase na xornada de clausura do festival, o vindeiro 20 de outubro.

No programa desta edición, Galicreques acolle doce estreas, a incluír Lémbrame. Spominaj na mnje, coprodución do Centro Dramático Galego coa compañía galega Títeres Alakrán e a alemá Bautzen Theater espectáculo, enchen de novidades o programa. Canda a esta, poderán verse as novas propostas das galegas Titiritres, que presenta Emotivas e mais Olga Abad, que leva a escena Un gran plan. Pola súa banda, a portuguesa Marionetas Rui Sousa, presenta As marionetas tambén tém coração e participa Nuno Correia Puinto e Luis Manhita en Portugalidades, obras que farán parte da homenaxe ao cincuentenario da Revolución do 25 de abril o día 13.

Desde Arxentina, Tres Tigres presentará Desde El Altillo. Historia de un exilio, e a franco-arxentina Signe Diesel, inaugurará Kazu. Os salvadoreños de Ocelot teatro estrean Martín cabeza de hacha, mentres que os colombianos La Pepa del Mamoncillo representarán por vez primeira en Europa a súa peza Napoleón e Josefina. Desde Andalucía La Sal Teatro achega El Traje, mentres os valencianos de Vudú Teatro levan ás táboas Oráculo FM. A completar as estreas, o grupo conquense Títeres Larderos dará a coñecer en Galicreques a súa obra Pelos Operación Agua.

A presenza galega nesta edición do festival complétase con Danthea Teatro, Títeres Cascanueces, Brincadeira, Títeres Cachirulo, Luis Vallecillo, a artista arxentina-galega Gabriela González López e Carmen Domech.

Sete centros socioculturais do concello ademais dos habituais escenarios do Teatro Principal, o Salón Teatro, a Fundación SGAE e a Alameda acollerán as funcións deste programa, que organiza a Asociación Cultural Barriga Verde coa colaboración do Concello de Santiago, da Xunta de Galicia, da Deputación da Coruña, do Instituto Nacional de Artes Escénicas e Musicais (Inaem), de Iberescena e da Fundación SGAE. Canda ás funcións para público xeral, o programa acollerá quince funcións escolares entre o luns 14 e o venres 18 de outubro.