Vista aérea da Croa de Posmarcos.
O alcalde da Pobra do Caramiñal, José Carlos Vidal Suárez, anunciou o sábado pasado na inauguración das xornadas "A Pobra do Caramiñal no tempo" a finalización do proceso de adquisición de A Croa de Posmarcos, un dos dous castros catalogados no termo municipal. A Croa de Posmarcos atópase na parroquia de Santo Isidro de Posmarcos, dominando un pequeno pero fértil val agrario interior aos pés da serra do Barbanza. Trátase dun castro pequeno: a croa, o espazo intramuros do interior, ten unha superficie de 3300 metros cadrados e as estruturas visibles no xacemento apenas chegan á hectárea. O castro defínese por un único recinto encravado no alto dun outeiro e protexido por un parapeto circular, que cara o oeste parece ter estruturas monumentais adicionais. José Carlos Vidal anunciou tamén o inicio das intervencións científicas no xacemento para o ano 2025, cunha primeira campaña na que se explorará o xacemento con técnicas xeofísicas, que permitirán ter unha primeira idea do castro e formular posteriores actuacións tanto desde o punto de vista da posta en valor cultural e turística coma do interese científico. O castro reúne tamén a peculiaridade de atoparse no territorio no que se conservou, no nome da parroquia de San Isidro de Posmarcos, o nome do pobo que habitou este espazo na Idade do Ferro: os Celticos Praestamaricos, transmitido entre outros autores polo xeógrafo romano Plinio o Vello.
